એ સ્પષ્ટ થઈ ગયું છે કે એન્ફોર્સમેન્ટ ડિરેક્ટોરેટ (ED)ના ચોથા સમન્સ પર પણ દિલ્હીના મુખ્યમંત્રી અરવિંદ કેજરીવાલ પૂછપરછ માટે હાજર નહીં થાય. દિલ્હીના કથિત દારૂ કૌભાંડમાં સમન્સ પાઠવવામાં આવેલા અરવિંદ કેજરીવાલે તપાસ એજન્સીને પોતાનો જવાબ મોકલી દીધો છે. ED ઓફિસને બદલે કેજરીવાલ ત્રણ દિવસ માટે ગોવા જઈ રહ્યા છે. તેઓ લોકસભા ચૂંટણી માટે પાર્ટીની તૈયારીઓની સમીક્ષા કરશે.
આમ આદમી પાર્ટીએ એક નિવેદન જારી કરીને કહ્યું કે દિલ્હીના મુખ્યમંત્રી અરવિંદ કેજરીવાલે EDને પોતાનો જવાબ મોકલી દીધો છે. આમ આદમી પાર્ટી (AAP)એ ફરી એકવાર અરવિંદ કેજરીવાલની ધરપકડનો ભય વ્યક્ત કર્યો છે. પાર્ટીએ કહ્યું છે કે તેનો ઉદ્દેશ્ય કેજરીવાલની ધરપકડ કરવાનો છે જેથી તેઓ લોકસભા ચૂંટણી માટે પ્રચાર ન કરી શકે.
AAPએ દાવો કર્યો છે કે EDએ લખ્યું છે કે કેજરીવાલ આરોપી નથી. પાર્ટીએ પૂછ્યું કે કેજરીવાલને શા માટે સમન્સ મોકલવામાં આવી રહ્યા છે અને તેમની ધરપકડના પ્રયાસો કરવામાં આવી રહ્યા છે. પાર્ટીએ કહ્યું, ‘ભ્રષ્ટ નેતાઓ ભાજપમાં જોડાયા અને તેમના કેસ બંધ થઈ ગયા. અમે કોઈ ભ્રષ્ટાચાર કર્યો નથી. અમારો કોઈ નેતા ભાજપમાં જોડાશે નહીં.
કથિત દારૂ કૌભાંડ સંબંધિત મની લોન્ડરિંગ કેસમાં તપાસ એજન્સીએ અત્યાર સુધીમાં અરવિંદ કેજરીવાલને કુલ ચાર વખત સમન્સ મોકલ્યા છે. અગાઉ તેમને 2 નવેમ્બર, 22 ડિસેમ્બર અને 3 જાન્યુઆરીએ બોલાવવામાં આવ્યા હતા. કેજરીવાલે સમન્સને ગેરકાયદેસર અને રાજકીય રીતે પ્રેરિત ગણાવીને હાજર થવાનો ઇનકાર કર્યો હતો. તેમણે કહ્યું હતું કે તેમને પહેલા જણાવવામાં આવે કે તેમને કઈ ક્ષમતામાં (આરોપી કે સાક્ષી, દિલ્હીના સીએમ કે AAP કન્વીનર) બોલાવવામાં આવી રહ્યા છે. સમન્સની અવગણના કરવા બદલ ભારતીય જનતા પાર્ટી દિલ્હીના સીએમ પર પ્રહારો કરી રહી છે.
