ઈ પલાનીસ્વામી AIADMKના જનરલ સેક્રેટરી તરીકે ચૂંટાયા, મદ્રાસ હાઈકોર્ટે ઓ પનીરસેલ્વમની અરજી ફગાવી

મદ્રાસ હાઈકોર્ટે AIADMKના હકાલપટ્ટી કરાયેલા નેતા ઓ પનીરસેલ્વમની અરજીને ફગાવી દીધી છે. જણાવી દઈએ કે ઓ પનીરસેલ્વમ અને તેમના સમર્થકોએ 11 જુલાઈએ પાર્ટીની જનરલ કાઉન્સિલના ઠરાવ વિરુદ્ધ આ અરજી દાખલ કરી હતી, જેમાં ઓ પનીરસેલ્વમ અને તેમના સમર્થકોને પાર્ટીમાંથી બહારનો રસ્તો બતાવવામાં આવ્યો હતો. બીજી તરફ, ઓ પનીરસેલ્વમની અરજીને કોર્ટે ફગાવી દીધા બાદ ઈ પલાનીસામીને પાર્ટીના નવા જનરલ સેક્રેટરી તરીકે પસંદ કરવામાં આવ્યા છે.

AIADMK પાર્ટી હેડક્વાર્ટર ખાતે ઉજવણી

ઓ પનીરસેલ્વમે એઆઈએડીએમકેની જનરલ કાઉન્સિલની રચના અને પાર્ટીના મહાસચિવ તરીકે ઈ પલાનીસ્વામીની ચૂંટણીને હાઈકોર્ટમાં પડકારી હતી. જો કે કોર્ટે અરજી ફગાવી દીધી હતી. AIADMK પાર્ટીના વકીલ આઈએસ ઈમ્બાદુરાઈએ કહ્યું કે કોર્ટે પાર્ટીના મહાસચિવની ચૂંટણી વિરુદ્ધ દાખલ કરવામાં આવેલી તમામ અરજીઓ ફગાવી દીધી છે. પનીરસેલ્વમે 11 જુલાઈ 2022ના રોજ પાર્ટીની જનરલ કાઉન્સિલ દ્વારા પસાર કરાયેલા ઠરાવ વિરુદ્ધ અરજી દાખલ કરી હતી પરંતુ કોર્ટે અરજીને ફગાવી દીધા પછી, એવું નક્કી કરવામાં આવ્યું છે કે કાઉન્સિલ માન્ય છે અને તેના દ્વારા પસાર કરાયેલ ઠરાવ પણ માન્ય છે.

કોર્ટના ચુકાદા બાદ AIADMK હેડક્વાર્ટર ખાતે ઉજવણીઓ ફાટી નીકળી હતી, પલાનીસ્વામીના સમર્થકોએ મીઠાઈઓ વહેંચીને અને ફટાકડા ફોડીને આનંદ કર્યો હતો. પલાનીસ્વામી પણ સમર્થકોનું અભિવાદન સ્વીકારવા પાર્ટી હેડક્વાર્ટર પહોંચ્યા હતા.

AIADMK મેમ્બરશિપ ડ્રાઇવ ચલાવશે

મદ્રાસ હાઈકોર્ટના નિર્ણય બાદ, રિટર્નિંગ ઓફિસર નાથમ આર વિશ્વનાથન અને પોલાચી વી જારામન AIADMK હેડક્વાર્ટર પહોંચ્યા અને પલાનીસ્વામીને પ્રમાણપત્ર સોંપ્યું. આ પછી પાર્ટીના નેતાઓએ પાર્ટીના મહાસચિવ ઈ પલાનીસ્વામીનું પણ શાલ ઓઢાડીને સન્માન કર્યું હતું. તે જ સમયે, ઇ પલાનીસ્વામીએ AIADMKના મહાસચિવનું પદ સંભાળ્યા પછી તરત જ 5 એપ્રિલથી એક નવું સભ્યપદ અભિયાન શરૂ કરવાની જાહેરાત કરી હતી.