સંસદનું બજેટ સત્ર 31 જાન્યુઆરીથી શરૂ થશે. આ સત્ર 6 એપ્રિલ સુધી ચાલશે. સત્રની શરૂઆત લોકસભા અને રાજ્યસભાના સંયુક્ત સત્રથી થશે. આ દરમિયાન રાષ્ટ્રપતિ દ્રૌપદી મુર્મુ બંને ગૃહોને સંબોધિત કરશે. સંસદના બંને ગૃહોને આ તેમનું પ્રથમ સંબોધન હશે. મળતી માહિતી મુજબ બજેટ સત્રના પહેલા દિવસે બંને ગૃહોમાં આર્થિક સર્વે રજૂ કરવામાં આવશે. આ પછી નાણામંત્રી નિર્મલા સીતારમણ સંસદમાં કેન્દ્રીય બજેટ રજૂ કરશે. 1 ફેબ્રુઆરીએ બજેટ રજૂ કરવામાં આવશે.
કેન્દ્રીય મંત્રી પ્રહલાદ જોશીએ માહિતી આપી હતી કે સંસદનું બજેટ સત્ર 31 જાન્યુઆરીથી શરૂ થશે અને સામાન્ય રજા સહિત 66 દિવસમાં 27 બેઠકો સાથે 6 એપ્રિલ સુધી ચાલશે. અમૃતકાળ દરમિયાન રાષ્ટ્રપતિના અભિભાષણ, કેન્દ્રીય બજેટ અને અન્ય વસ્તુઓ પર આભાર પ્રસ્તાવ પર ચર્ચા કરવા આતુર છીએ. તેમણે માહિતી આપી હતી કે બજેટ સત્ર 2023 દરમિયાન, 14 ફેબ્રુઆરીથી 12 માર્ચ સુધી રજા રહેશે, જેથી વિભાગ-સંબંધિત સંસદીય સ્થાયી સમિતિઓ અનુદાન માટેની માંગણીઓની તપાસ કરી શકે અને તેમના મંત્રાલયો અને વિભાગો સંબંધિત અહેવાલો તૈયાર કરી શકે.
