સાબરમતી વિસ્તારમાં આવેલા અચેરના છારાનગરમાં જુગારધામ પર દરોડો પાડવા ગયેલી ડી સ્ટાફની ટીમ પર હુમલાની ઘટના બની છે. જેમાં PSI બી.પી ભેટરીયા અને એક કોન્સ્ટેબલને ઇજા થતા સારવાર માટે હોસ્પિટલમાં ખસેડવામાં આવ્યા છે. પોલીસે બે જુગારીઓને ઝડપી પાડ્યા છે. સાબરમતી ડી સ્ટાફના મહિલા પીએસઆઈ બી.પી ભેટરીયા અને તેમની ટીમને બાતમી મળી હતી કે અચેર છારાનગરમાં કેટલાક લોકો જુગાર રમે છે જેના આધારે ટીમે દરોડો પાડયો હતો. પોલીસ આરોપીને લઈ જતી હતી ત્યારે જુગાર રમાડતા સુરેશ છારા (જાડેજા)ના માણસોએ પોલીસ પર પથ્થરમારો કર્યો હતો. પોલીસ સાથે ઝપાઝપી કરી હતી. બે જુગારીને પોલીસ પકડવામાં સફળ થઈ હતી. 10થી 15 લોકોના ટોળાએ હુમલો કર્યો હતો. PSI અને કોન્સ્ટેબલને સારવાર માટે હોસ્પિટલમાં ખસેડવામાં આવ્યા છે. ઝોન 2 ડીસીપી ધર્મેન્દ્ર શર્માએ જણાવ્યું હતું કે પોલીસ પર હુમલો કરનાર લોકો સામે ગુનો નોંધવાની કાર્યવાહી કરવામાં આવી રહી છે.
