આગામી એશિયા કપ-2023ની યજમાની કયો દેશ કરશે તે અંગે હજુ સુધી કોઈ નિર્ણય લેવામાં આવ્યો નથી. પાકિસ્તાનને એશિયા કપની યજમાનીનો અધિકાર મળ્યો હતો, પરંતુ ભારતીય ક્રિકેટ કંટ્રોલ બોર્ડ (BCCI)ના સચિવ જય શાહે સ્પષ્ટ કરી દીધું હતું કે ટીમ ઈન્ડિયા પાકિસ્તાનમાં રમવા જશે નહીં. દરમિયાન હવે BCCIએ ટીમ ઈન્ડિયાની ટીમની જાહેરાત કરી છે. આ સાથે જ ભારત અને પાકિસ્તાન વચ્ચેની મેચની તારીખ પણ સામે આવી ગઈ છે.
ભારતીય ક્રિકેટ બોર્ડે શુક્રવારે મહિલા ક્રિકેટના એશિયા કપ માટે ટીમની જાહેરાત કરી હતી, પુરૂષ ક્રિકેટની નહીં. બોર્ડે મહિલા ઇમર્જિંગ એશિયા કપ માટે ભારત A ની 14 સભ્યોની ટીમ અને મેચોનું શેડ્યૂલ જાહેર કર્યું છે. બોર્ડે ટ્વીટ કરીને આ અંગેની માહિતી આપી છે. શ્વેતા સેહરાવતને ટીમની કેપ્ટનશીપ આપવામાં આવી છે જ્યારે સૌમ્યા તિવારીને વાઇસ કેપ્ટનની જવાબદારી સોંપવામાં આવી છે.
હોંગકોંગના ટીન ક્વાંગ રોડ રિક્રિએશન ગ્રાઉન્ડ ખાતે રમાનારી આ ટુર્નામેન્ટ 12 જૂનથી શરૂ થશે, જ્યારે ભારતીય મહિલા A ટીમ તેની પ્રથમ મેચ 13 જૂને રમશે. ભારતની પ્રથમ મેચ હોંગકોંગ A સામે થશે. ટીમ આગામી મેચ થાઈલેન્ડ A સામે રમશે જ્યારે ટીમની મેચ પાકિસ્તાન A સામે 17 જૂને થશે.
શ્વેતા સેહરાવત (કેપ્ટન), સૌમ્ય તિવારી (વાઈસ-કેપ્ટન), ત્રિશા ગોંગડી, મુસ્કાન મલિક, શ્રેયંકા પાટિલ, કનિકા આહુજા, ઉમા ક્ષેત્રી (વિકેટ-કીપર), મમતા માડીવાલા (વિકેટ કીપર), તિતાસ સંધુ, યશશ્રી એસ, કશ્વી ગૌતમ , પાર્શ્વી ચોપરા, મન્નત કશ્યપ, બી અનુષા
આ ટુર્નામેન્ટમાં 8 ટીમો ભાગ લેશે, જેને બે ગ્રુપમાં વહેંચવામાં આવી છે. એક ગ્રુપમાં ચાર ટીમો હશે. ભારત A, પાકિસ્તાન A, હોંગકોંગ A અને થાઇલેન્ડ A ગ્રૂપ Aમાં જ્યારે બાંગ્લાદેશ A, શ્રીલંકા A, મલેશિયા A અને UAE A ગ્રુપ Bમાં રહેશે. ટૂર્નામેન્ટ 12 જૂનથી શરૂ થવાની છે, જ્યારે તેની ફાઇનલ મેચ 21 જૂને રમાશે.
