રાજ્યના અનેક જિલ્લાઓમાં ચાર દિવસથી વરસાદ પડી રહ્યો છે અને હવામાન વિભાગે ભારે વરસાદની આગાહી કરી છે, આજે અમદાવાદ શહેરમાં વરસાદી માહોલ સર્જાયો હતો અને 10 વાગ્યા બાદ શહેરના અનેક વિસ્તારોમાં ભારે વરસાદ શરૂ થયો હતો. શહેરમાં ભારે વરસાદને કારણે અનેક વિસ્તારોમાં પાણી ભરાયા છે અને વાહનચાલકોને મુશ્કેલીનો સામનો કરવો પડી રહ્યો છે.
અમદાવાદમાં સવારથી જ વરસાદી માહોલ જોવા મળ્યો હતો અને 10 વાગ્યા બાદ અનેક વિસ્તારોમાં નીચાણવાળા વિસ્તારોમાં પાણી ભરાયા હતા. આ ઉપરાંત શહેરના અનેક માર્ગો પર ભારે ટ્રાફિક જોવા મળ્યો હતો. શહેરના નરોડા, નવા નરોડા, નિકોલ, કૃષ્ણનગર, સૈજપુર, મેસ્કો, શિવરંજની, શ્યામલ, સેટેલાઈટ, વસ્ત્રાપુર અને એસજી હાઈવે પર વરસાદ પડ્યો હતો, જેના કારણે અનેક રસ્તાઓ પર ટ્રાફિક જામ થઈ ગયો હતો. શહેરમાં વરસાદના કારણે વાતાવરણમાં ઠંડક પ્રસરી ગઈ છે. શહેરમાં ભારે વરસાદના કારણે માર્ગો પર પાણી ભરાયા હતા.
રાજ્યમાં સાર્વત્રિક રીતે વરસાદ પડી રહ્યો છે અને કેટલાક વિસ્તારોમાં મુશળધાર વરસાદને કારણે ઘણા વિસ્તારોમાં પાણી ભરાયા હતા. ગત રાત્રે ગાંધીનગરમાં વરસાદની જોરદાર એન્ટ્રી થઈ હતી અને અનરાધાર વરસાદને કારણે જી2 અને પથિકાશ્રમ પાસે પાણી ભરાઈ ગયા હતા. આ સાથે ગઈ કાલે અમદાવાદમાં હળવો વરસાદ પડ્યો હતો, જેમાં વસ્ત્રાપુર, એસજી હાઈવે અને ગોતામાં વરસાદ પડ્યો હતો. રાજ્યમાં હવામાન વિભાગે આગામી 1લી જુલાઈ સુધી વરસાદની આગાહી કરી છે અને નવસારી અને વલસાડમાં ભારે વરસાદની શક્યતાને પગલે રેડ એલર્ટ જાહેર કર્યું છે. આ ઉપરાંત સુરત અને ડાંગ તેમજ તાપીમાં વરસાદની સંભાવનાને લઈને ઓરેન્જ એલર્ટ જાહેર કરવામાં આવ્યું છે. આ સાથે દાદરા નગર હવેલી અને દમણમાં પણ રેડ એલર્ટ જાહેર કરવામાં આવ્યું છે.
