સુપ્રીમ કોર્ટે સ્પાઈસ જેટને મોટો ઝટકો આપ્યો છે. કોર્ટે એરલાઇન કંપનીને તેના પૂર્વ પ્રમોટર કલાનિથિ મારનને રૂ. 380 કરોડની આર્બિટ્રેશન રકમ ચૂકવવાનો નિર્દેશ આપ્યો છે. સુપ્રીમ કોર્ટે એમ પણ કહ્યું હતું કે બિઝનેસને ‘બિઝનેસ એથિક્સ’ સાથે ચલાવવો જોઈએ.
જણાવી દઈએ કે જૂનમાં દિલ્હી હાઈકોર્ટે સ્પાઈસજેટને 7 વર્ષ જૂના શેર ટ્રાન્સફર વિવાદમાં મારનને 380 કરોડ રૂપિયા ચૂકવવા કહ્યું હતું. કોર્ટે એરલાઈનને ચાર સપ્તાહની અંદર તેની સંપત્તિની વિગતો આપવાનો પણ નિર્દેશ આપ્યો છે. અગાઉ 13 ફેબ્રુઆરીએ સુપ્રીમ કોર્ટના ચીફ જસ્ટિસ ડીવાય ચંદ્રચુડ અને જસ્ટિસ પીએસ નરસિમ્હા અને જેબી પારડીવાલાની બેંચે સ્પાઈસ જેટને ત્રણ મહિનાની અંદર આર્બિટ્રેશનની રકમના વ્યાજ તરીકે મારન અને કાલ એરવેઝને રૂ. 75 કરોડ ચૂકવવા નિર્દેશ આપ્યો હતો.
દિલ્હી હાઈકોર્ટના 2 નવેમ્બર, 2020ના આદેશ સામે સ્પાઈસજેટની અપીલ પર સુપ્રીમ કોર્ટ સુનાવણી કરી રહી હતી. વાસ્તવમાં, 20 જુલાઈ, 2018ના રોજ, આર્બિટ્રેશન ટ્રિબ્યુનલે ‘વોરંટ’ જારી ન કરવા બદલ મારન અને કાલ એરવેઝના રૂ. 1,323 કરોડના નુકસાનીનો દાવો ફગાવી દીધો હતો. પરંતુ વ્યાજ સાથે રૂ. 578 કરોડ ચૂકવવાનો નિર્દેશ આપવામાં આવ્યો હતો. સન ટીવી નેટવર્કના માલિક મારન આર્બિટ્રેશન ટ્રિબ્યુનલના આદેશ સામે હાઈકોર્ટમાં ગયા હતા.
શું છે મામલો: આ કેસ સ્પાઇસજેટ અને તેના પ્રમોટર અજય સિંહને માલિકી ટ્રાન્સફર કર્યા પછી મારનની તરફેણમાં ‘વોરંટ’ જારી ન કરવા સંબંધિત છે. સિંઘે એરલાઇનની નાણાકીય કટોકટી વચ્ચે ફેબ્રુઆરી 2015માં સ્પાઇસજેટ પર ફરીથી નિયંત્રણ મેળવ્યું હતું. મારન અને કાલ એરવેઝે ફેબ્રુઆરી 2015માં સ્પાઈસ જેટનો સમગ્ર 35.04 ટકા ઈક્વિટી હિસ્સો કંપનીના સહ-સ્થાપક સિંઘને માત્ર રૂ. 2માં ટ્રાન્સફર કર્યો હતો. આ એરલાઇનમાં 58.46 ટકા હિસ્સો છે.
