2019 માં, ટોયોટાએ જાપાન એરોસ્પેસ એક્સપ્લોરેશન એજન્સી (JAXA) ના સહયોગથી હાઇડ્રોજન સંચાલિત મૂન રોવરના વિકાસની જાહેરાત કરી. અને હવે ટોયોટા એક મહત્વાકાંક્ષી રોવર બનાવી રહી છે જેને “લુનર ક્રુઝર” કહેવામાં આવે છે. આ મૂન રોવર અવકાશયાત્રીઓને ચંદ્ર અને મંગળની સપાટી પર રહેવા અને અન્વેષણ કરવામાં મદદ કરશે. ટોયોટાનું લક્ષ્ય 2040 સુધીમાં ચંદ્ર પર અને પછી મંગળ પર માનવ હાજરીને ટકાવી રાખવા માટે વિશિષ્ટ વાહન બનાવવાનું છે.
10 ટન વજન
લુનર ક્રુઝરને આ ચોક્કસ મિશનને ધ્યાનમાં રાખીને ડિઝાઇન કરવામાં આવી છે. આમાં અવકાશયાત્રીઓને અંદર સ્પેસ સૂટ પહેરવાની જરૂર નહીં પડે. અંદર લગભગ 460 ક્યુબિક ફૂટ લિવિંગ સ્પેસ હશે, જે ચાર મુસાફરો માટે પૂરતી જગ્યા પૂરી પાડશે. જો જરૂરી હોય તો, તેમાં બે લોકો માટે આરામથી રહેવાની જગ્યા પણ હશે. રોવરનું વજન લગભગ 10 ટન હોવાની ધારણા છે અને તેનો ઉપયોગ ચંદ્રના ધ્રુવીય પ્રદેશોની શોધખોળ અને સંસાધનોની શોધ માટે કરવામાં આવશે.
લુનર ક્રુઝરને ખાસ ટેક્નોલોજીથી ચલાવવામાં આવશે જે તેને ચંદ્ર અને મંગળના અન્ય ભાગોના તાપમાન અને ધૂળથી બચાવવામાં મદદ કરશે. રોવરને પાવર સપ્લાય માટે રિજનરેટિવ ફ્યુઅલ ટેકનોલોજીનો ઉપયોગ કરવામાં આવી રહ્યો છે.
રોવર વિદ્યુત વિચ્છેદન-વિશ્લેષણ પ્રક્રિયા દ્વારા પાણીને હાઇડ્રોજન અને ઓક્સિજનમાં વિભાજિત કરશે, જે પછી ફ્યુઅલ સેલમાં સંગ્રહિત થશે. આ ફ્યુઅલ સેલના ઉપયોગથી મેળવેલ પાવરનો ઉપયોગ રાત્રે કરવામાં આવશે. અગાઉ મોકલવામાં આવેલા રોવર્સે સૌર ઉર્જાનો ઉપયોગ કર્યો હતો, પરંતુ ચંદ્ર પર રાત્રિનો સમયગાળો લગભગ 14 દિવસનો હોય છે, જેના કારણે સૌર ઉર્જાથી વીજળી પૂરી પાડવામાં મુશ્કેલી પડે છે. તેથી જ રિજનરેટીંગ ફ્યુઅલ ટેક્નોલોજીએ આ સમસ્યાનો ઉકેલ રજૂ કર્યો છે.
લુનર ક્રુઝરની મિશન લાઇફ 10 વર્ષ હોવાનું અનુમાન છે અને તે વર્ષમાં 42 દિવસ સુધી કામ કરી શકે છે. આના માટે મોટી માત્રામાં પાણીની જરૂર પડશે, જે ભવિષ્યમાં ચંદ્રના ધ્રુવોમાંથી મેળવી શકાશે. ટોયોટા ભારતીય અને વિદેશી અવકાશ સંબંધિત કંપનીઓ સાથે મળીને આ વિશાળ મિશનને સફળ બનાવવા માટે પ્રતિબદ્ધ છે.
