પ્રસિદ્ધ અર્થશાસ્ત્રી અને ભારતીય રિઝર્વ બેંકના ભૂતપૂર્વ ગવર્નર રઘુરામ રાજને કહ્યું કે ભારતે 2047 સુધીમાં વિકસિત રાષ્ટ્ર બનવા માટે શિક્ષણ અને આરોગ્ય ક્ષેત્રો પર ધ્યાન કેન્દ્રિત કરવાની જરૂર છે. તેમણે કહ્યું કે દેશે છેલ્લા 25 વર્ષમાં સરેરાશ છ ટકાનો વિકાસ દર જાળવી રાખ્યો છે, આ કોઈ પણ દેશ માટે આસાન નથી. રાજને દેશનો મજબૂત પાયો બનાવવા માટે શાસન સુધારણાની સાથે શિક્ષણ અને આરોગ્ય ક્ષેત્રો પર ધ્યાન કેન્દ્રિત કરવાની વાત કરી હતી.
માથાદીઠ આવક 10000 ડોલર સુધી પહોંચી જશે
રાજને કોલકાતા લિટરરી મીટમાં ‘બ્રેકિંગ ધ મોલ્ડઃ રિઇમેજિંગ ઈન્ડિયાઝ ઈકોનોમિક ફ્યુચર’ પુસ્તકના વિમોચન સમયે આ વાત કહી હતી. તેમણે અર્થશાસ્ત્રી રોહિત લાંબા સાથે મળીને પુસ્તક લખ્યું છે. તેમણે કહ્યું કે જો ભારતને 2047 સુધીમાં વિકસિત રાષ્ટ્ર બનવું હોય તો તેણે 7 ટકાથી વધુનો વાર્ષિક વિકાસ દર હાંસલ કરવો પડશે. તેમણે કહ્યું, ‘7 ટકાના વિકાસ દરે, દેશની માથાદીઠ આવક વર્તમાન $2,400 થી વધીને 2047માં $10,000 થશે.’
2050 પછી ડેમોગ્રાફિક ડિવિડન્ડ ઘટશે
રાજને કહ્યું કે ભારતને હાલમાં જે ડેમોગ્રાફિક ડિવિડન્ડ મળી રહ્યું છે તે 2050 પછી ઘટશે. તેથી હવેથી ભવિષ્યની દિશા નક્કી કરવાની જરૂર છે. રાજને કહ્યું કે વિકાસને જાળવી રાખવા માટે દેશે શિક્ષણ, સ્વાસ્થ્ય અને ગવર્નન્સ રિફોર્મને મહત્વ આપવું જોઈએ. તેમણે સમાજના તમામ વર્ગોમાં સંતુલિત વૃદ્ધિની જરૂરિયાત પર પણ ભાર મૂક્યો, કારણ કે વપરાશ વૃદ્ધિ હાલમાં ફક્ત ઉચ્ચ આવક જૂથોમાં જ મજબૂત છે.
