ICC T20 વર્લ્ડ કપ 2024માં રમવાનું ઉન્મુક્ત ચંદનું સપનું તૂટતું જોવા મળી રહ્યું છે. પોતાની કેપ્ટનશિપમાં ટીમ ઈન્ડિયાને અંડર-19 વર્લ્ડ કપ જીતાડનાર ઉન્મુક્ત અમેરિકા શિફ્ટ થઈ ગયો છે અને ત્યાં ક્રિકેટ રમી રહ્યો છે. એવી આશા હતી કે ઉન્મુક્ત ચંદને ICC T20 વર્લ્ડ કપ 2024 માટે અમેરિકી ટીમમાં સ્થાન મળશે, પરંતુ હાલમાં તેની આશાઓ ઓછી થતી જોવા મળી રહી છે. અમેરિકાએ કેનેડા સામેની પાંચ મેચની T20 આંતરરાષ્ટ્રીય શ્રેણી માટે ટીમની જાહેરાત કરી છે. ઉન્મુક્ત ચંદને ટીમમાં સ્થાન મળ્યું નથી, પરંતુ આ યાદીમાં ન્યૂઝીલેન્ડના પૂર્વ ઓલરાઉન્ડર કોરી એન્ડરસનનું નામ સામેલ છે. 33 વર્ષીય કોરી એન્ડરસને નવેમ્બર 2018માં ન્યૂઝીલેન્ડ માટે તેની છેલ્લી આંતરરાષ્ટ્રીય મેચ રમી હતી, ત્યારબાદ તે ટીમમાંથી બહાર થયા બાદ 2020માં અમેરિકા ગયો હતો. માઇનોર લીગ ક્રિકેટમાં એન્ડરસને 28 ઇનિંગ્સમાં 146ના સ્ટ્રાઇક રેટથી 900થી વધુ રન બનાવ્યા છે અને આ પ્રદર્શનના આધારે તેને ટીમમાં જગ્યા મળી છે.
ICC T20 વર્લ્ડ કપ 2 જૂનથી રમાશે. આ વખતે T20 વર્લ્ડ કપ અમેરિકા અને વેસ્ટ ઈન્ડિઝની યજમાનીમાં રમાઈ રહ્યો છે અને યજમાન હોવાને કારણે અમેરિકા અને વેસ્ટ ઈન્ડિઝ T20 વર્લ્ડ કપમાં ભાગ લઈ રહ્યા છે. કેનેડા સામેની પાંચ મેચોની શ્રેણી માટે યુએસ ટી20 ટીમમાં ઘણા નવા ચહેરા છે. સૌથી પહેલા વાત કરીએ કોરી એન્ડરસનની, આ કિવી ખેલાડી તેની વિસ્ફોટક બેટિંગ માટે પ્રખ્યાત છે. એન્ડરસને કીવી ટીમ માટે કુલ 93 આંતરરાષ્ટ્રીય મેચમાં 95 સિક્સર ફટકારી છે. એન્ડરસન લાંબી સિક્સર મારવા માટે ખૂબ જ પ્રખ્યાત છે. કોરી એન્ડરસને ન્યુઝીલેન્ડ માટે કુલ 13 ટેસ્ટ, 49 વનડે અને 31 ટી20 આંતરરાષ્ટ્રીય મેચ રમી છે. તેના નામે એક ટેસ્ટ અને એક વનડે સદી નોંધાયેલી છે. તેના સિવાય ભારતના અંડર-19 ક્રિકેટર હરમીત સિંહને પણ અમેરિકન ટીમમાં જગ્યા મળી છે.
કેનેડા સામેની T20 શ્રેણી માટે યુએસની ટીમ- મોનાંક પટેલ (કેપ્ટન), એરોન જોન્સ (વાઈસ-કેપ્ટન), કોરી એન્ડરસન, ગજાનંદ સિંહ, જેસી સિંઘ, સૌરભ નેત્રવૉકર, નિસગ્રા પટેલ, સ્ટીવન ટેલર, એન્ડ્રેસ ગોસ, હરમીત સિંહ, શેડલી વાન, નોશ્તુશ કેન્ઝિગ, મિલિંદ કુમાર, નીતિશ કુમાર, ઉસ્માન રફીક.
