સુરતના લીંબાયત વિસ્તારમાં બાઇક બળી ગયાની ઘટના સામે આવી છે. મારુતિનગર ખાતે પોલીસના ગોડાઉનમાં આગ લાગી હતી. અહિં પોલીસ દ્વારા વાહનો જમા કરવાના ગોડાઉનમાં આગ લાગી હતી. જેમાં 10 જેટલા બાઇક આગમાં બળી ગયા છે. આથી ફાયરની ટીમે આ ઘટના સ્થળે પહોચીને આગ પર કાબૂ મેળવ્યો છે. ફાયર વિભાગ દ્વારા ભારે જહેમત બાદ આગને કાબુમાં લઇ લેવાઇ હતી. જો કે આગ એટલી વિકરાળ હતી કે ગોડાઉનમાં રહેલા 10 વાહનો (બાઇક,મોપેડ, સ્કુટર) બળીને ખાખ થઇ ગયા હતા. જો કે ગોડાઉનમાં આગ લાગતા આસપાસની સોસાયટીમાં રહેતા રહીશોમાં નાસભાગ મચી ગઇ હતી. બાઇકોનાં ટાયર બળવાનાં કારણે કાળા ડિબાંગ ધુમાડાના ગોટેગોટા આસપાસના વિસ્તારમાં ફેલાઇ જતા લોકોમાં કુતુહલ વ્યાપ્યું હતું. હાલ તો આગ કાબુમાં આવી ચુકી છે. અત્રે ઉલ્લેખનીય છે કે, આ ગોડાઉનમાં પોલીસ દ્વારા જપ્ત કરવામાં આવેલા વાહનો રાખવામાં આવે છે. આગ અંગે માહિતી મળતાની સાથે જ ફાયર વિભાગની 2 ગાડી ઘટના સ્થળે આવી પહોંચી હતી. આગને તત્કાલ કાબુ લેવાનાં પ્રયાસો હાથ ધરવામાં આવ્યા હતા.
