આમ આદમી પાર્ટી (AAP)ના રાજ્યસભાના સાંસદ રાઘવ ચઢ્ઢા, જેમણે તાજેતરમાં લગ્ન કર્યા છે, તેમને મળેલો મોટો બંગલો ખાલી કરવા નથી માંગતા. દિલ્હીની કોર્ટે ટાઇપ-7 બંગલા અંગે તેમની વિરુદ્ધ આદેશ જારી કર્યા બાદ તેણે હાઇકોર્ટનો સંપર્ક કર્યો છે. આ અરજી ચીફ જસ્ટિસ સતીશ ચંદ્ર શર્મા અને જસ્ટિસ સંજીવ નરુલાની બેંચ સમક્ષ લિસ્ટ કરવામાં આવી છે. ચઢ્ઢાના વકીલે કહ્યું, ‘સાંસદને ઘર ખાલી કરવાનો આદેશ આપવામાં આવ્યો છે. અમને ડર છે કે કાર્યવાહી શરૂ થઈ શકે છે. અમારે ટ્રાયલ કોર્ટમાં સ્ટે હતો.
દિલ્હીની પટિયાલા હાઉસ કોર્ટે પોતાના વચગાળાના આદેશમાં ફેરફાર કરતા કહ્યું હતું કે રાઘવ ચઢ્ઢા એવો દાવો કરી શકતા નથી કે ફાળવણી રદ થયા પછી પણ તેમને રાજ્યસભાના સભ્ય તરીકે સરકારી બંગલા પર કબજો ચાલુ રાખવાનો સંપૂર્ણ અધિકાર છે. અધિક જિલ્લા ન્યાયાધીશ સુધાંશુ કૌશિકે 18 એપ્રિલે રાજ્યસભા સચિવાલયને ચઢ્ઢાને સરકારી બંગલામાંથી બહાર ન કાઢવાનો નિર્દેશ આપતા આદેશને રદબાતલ કરતા આ અવલોકન કર્યું હતું.
5 ઑક્ટોબરના આદેશમાં, ન્યાયાધીશે જણાવ્યું હતું કે સંસદ સભ્યને એક વખત આપવામાં આવેલ આવાસ સભ્યના સમગ્ર કાર્યકાળ દરમિયાન કોઈપણ સંજોગોમાં રદ કરી શકાય નહીં તેવી દલીલ ફગાવી દેવાને પાત્ર છે. કોર્ટે કહ્યું કે સરકારી આવાસની ફાળવણી એ સાંસદને આપવામાં આવેલ વિશેષાધિકાર છે અને ફાળવણી રદ થયા પછી પણ તેને કબજો ચાલુ રાખવાનો કોઈ અધિકાર નથી. સાંસદને ભૂલથી ટાઈપ-7 બંગલો ફાળવવામાં આવ્યો હતો. પ્રથમ વખત સાંસદ હોવાના કારણે તેમને આ શ્રેણીનો બંગલો મળી શકે તેમ નથી.
