કોરોના મહામારી વચ્ચે છેલ્લા કેટલાક દિવસથી અમદાવાદ સહિત ગુજરાતમાં રેમડેસિવીર ઈન્જેક્શનનો મુદ્દો ખૂબ જ ચર્ચાનો વિષય બન્યો છે. અમદાવાદમાં ઝાયડસ હોસ્પિટલ તેમજ અન્ય શહેરોમાં રેમડેસિવીર ઈન્જેક્શન માટે લોકો પડાપડી કરી રહ્યા છે ત્યારે ગુજરાતના જાણીતા મોટિવેશનલ સ્પીકર સંજય રાવલે પણ રેમડેસિવિર ઇન્જેક્શન મુદ્દે  આક્ષેપ કર્યા છે.

રાજ્યમાં ઈન્જેક્શન માટે અમદાવાદ અને સુરત જેવા શહેરોમાં લોકો કલાકો સુધી લાઈનમાં ઉભા રહે છે.  આ મુદ્દે સંજય રાવલે આક્ષેપ કર્યો છે કે મહારાષ્ટ્રમાં કેસ વધુ તેમ છતાં ઇન્જેક્શન માટે લાઇન નથી, જ્યારે ગુજરાતમાં ઓછા કેસ છતાં ઇન્જેક્શન માટે પડાપડી થઈ રહી છે. તેમણે પોતાના ઈન્સ્ટાગ્રામ એકાઉન્ટ પર આ અંગે વીડિયો પોસ્ટ કરીને આક્ષેપ કર્યા છે.

તેમણે જણાવ્યું કે, મહારાષ્ટ્રમાં 50 હજાર કેસ છે તેમ છતાં ત્યાં ઈન્જેક્શન મેળવવા માટે લાઈનો નથી લાગતી. જ્યારે ગુજરાતમાં 5 હજાર કેસ છે અને કલાકો સુધી લોકો ઈન્જેક્શન માટે લાઈનમાં ઉભા રહે છે.  સાથે જ તેમણે ઈન્જેક્શનના કાળાબજારીનો મુદ્દો પણ આમાં ઉઠાવ્યો છે.  સંજય રાવલના આ વીડિયોને લોકો ખૂબ જ પસંદ કરી રહ્યા છે અને પોતાની પ્રતિક્રિયા પણ આપી રહ્યા છે. મહત્વનું છે કે, છેલ્લા કેટલાક દિવસથી ગુજરાતમાં રેમડેસિવીર ઈન્જેક્શનને લઈ ભારે અફરાતફરી સર્જાયેલી છે.

અમદાવાદ સહિત રાજ્યભરમાં વધતા કહેર વચ્ચે રેમડેસિવીર ઈન્જેકશનનો સ્ટોક ખૂટી પડતા ઝાયડસ કંપનીએ વેચાણ બંધ કર્યું હતું. જેના કારણે કોરોનાના દર્દીઓના પરિવારની ચિંતામાં વધારો થયો હતો.

ત્યારે હવે આ ઇન્જેક્શનને લઈ  સારા સમાચાર સામે આવ્યા છે. જે મુજબ ઝાયડસ દ્વારા ફરીથી એકવાર રેમડેસિવીર ઈન્જેકશનનું વેચાણ કરવામાં આવશે. રાજ્ય સરકારના પ્રતિનિધિ દ્વારા ઝાયડસ સાથે વાતચીત કરાઇ હતી.

કેન્દ્રીય મંત્રી મનસુખ માંડવીયાએ ટ્વિટ કરીને લખ્યું છે કે, ‘રેમડેસીવીર ઇન્જેક્શનનું વેચાણ ઝાયડસ હોસ્પિટલથી ફરી ચાલુ કરવા અંગે મેં પંકજભાઈ સાથે વાત કરી છે અને બહુ જલ્દી આ વેચાણ વ્યવસ્થા પુનઃ ચાલુ કરવામાં આવશે.’ ફરી એકવાર ઝાયડસ દ્વારા રેમડેસિવીર ઈન્જેક્શનનું વેચાણ શરુ કરવામાં આવશે તેવા અહેવાલ સામે આવતા કોરોનાના દર્દીઓના સગા સંબંધીઓએ પણ રાહતનો શ્વાસ લીધો છે.

અમદાવાદ શહેરમાં સતત કોરોના સંક્રમણ વધી રહ્યુ છે. આ કોરોના સંક્રમણની ચેન તોડવા માટે તંત્ર દ્વારા જે જગ્યા પર ભીડ એકત્ર થાય છે ત્યાં લારી ગલ્લા તેમજ દુકાનો બંધ કરાવામાં આવે છે.

ત્યારે મનપાના સોલિડ વેસ્ટ વિભાગે હાથ ધરેલી કાર્યવાહી પ્રમાણે, શહેરમાં જ્યાં સુધી કોરોના સંક્રમણ ઓછું ન થાય ત્યાં સુધી પાનના ગલ્લા બંધ કરવાનો આદેશ આપ્યો છે. તો જે લોકો આ આદેશનું પાલન નહીં કરે અને ગલ્લા ખોલશે તેમની સામે અમદાવાદ મહાનગરપાલિકા કડક કાર્યવાહી કરશે.

મહત્વનું છે કે, અમદાવાદમાં કોરોના સંક્રમણ વધતા મનપા એક્શનમાં આવી છે અને અનેક નિર્ણયો લઈ રહી છે ત્યારે હવે શહેરના પાન-ગલ્લા બંધ કરવાના આદેશ આપ્યા છે.