દિલ્હી હાઈકોર્ટે પ્રખ્યાત દારૂ કૌભાંડમાં મનીષ સિસોદિયાને રાહત આપવાનો ઈન્કાર કરી દીધો છે. દિલ્હી હાઈકોર્ટમાં દારૂ કૌભાંડના આરોપી મનીષ સિસોદિયાની જામીન અરજી ફગાવી દેવામાં આવી છે. જસ્ટિસ દિનેશ કુમાર શર્માએ સિસોદિયાના જામીન પર ચુકાદો આપ્યો છે. સિસોદિયા ઉપરાંત ઉદ્યોગપતિ અભિષેક બોઈનાપલ્લી, બેનય બાબુ અને વિજય નાયરની અરજીઓ પર પણ કોર્ટે પોતાનો ચુકાદો આપ્યો છે. કોર્ટે તેમની અરજી પણ ફગાવી દીધી છે. એન્ફોર્સમેન્ટ ડિરેક્ટોરેટ (ED) દ્વારા નોંધાયેલા મની લોન્ડરિંગ કેસમાં આ તમામ સહ-આરોપી છે.
દિલ્હીની અરવિંદ કેજરીવાલ સરકારે 17 નવેમ્બર 2021ના રોજ નવી આબકારી નીતિ લાગુ કરી હતી, પરંતુ ભ્રષ્ટાચારના આરોપો વચ્ચે સપ્ટેમ્બર 2022ના અંતમાં તેને પાછી ખેંચી લેવામાં આવી હતી. સિસોદિયાને સીબીઆઈ (સેન્ટ્રલ બ્યુરો ઑફ ઈન્વેસ્ટિગેશન) દ્વારા 26 ફેબ્રુઆરીના રોજ કૌભાંડમાં તેમની કથિત ભૂમિકા બદલ ધરપકડ કરવામાં આવી હતી અને ત્યારથી તેઓ કસ્ટડીમાં છે. હાઈકોર્ટે સીબીઆઈ કેસમાં 30 મેના રોજ તેમને જામીન આપવાનો ઈન્કાર કરી દીધો હતો. ED દ્વારા 9 માર્ચે તેની ધરપકડ કરવામાં આવી હતી અને હાલમાં તે ન્યાયિક કસ્ટડીમાં છે. 2 જૂને હાઈકોર્ટે સિસોદિયાની જામીન અરજી પર ચુકાદો અનામત રાખ્યો હતો. સિસોદિયાએ ‘મલ્ટીપલ સ્ક્લેરોસિસ’થી પીડિત તેમની પત્નીની બગડતી તબિયત સહિત વિવિધ આધારો પર જામીન માંગ્યા હતા. જોકે, EDએ દિલ્હીના પૂર્વ ડેપ્યુટી સીએમની જામીન અરજીનો વિરોધ કર્યો છે.
