‘અમે ગાંધીનગર એસઓજીમાંથી આવ્યા છીએ તું દારૂનો મોટો બૂટલેગર છો, તારી પાસે જે હોય તે મને આપી દે’ કહીને રાપરના માંજુવાસના યુવાનનું અપહરણ કરી દેવભૂમિ દ્વારકા અને જામનગરના શખ્સો સ્વિફ્ટ ગાડીને સાંતલપુર તરફ લઇને ભાગતા હતા ત્યારે આડેસર પોલીસ જોઇ જતાં તમામ આરોપીઓની અટકાયત કરી અપહરણની સાથે લૂંટના બનાવનો ગણતરીના કલાકોમાં પર્દાફાશ કર્યો છે. જો કે, આશ્ચર્ય વચ્ચે રાપર પોલીસે પોતે આ બનાવનો ભેદ ઉકેલ્યો હોવાની પ્રેસનોટ જાહેર કરી છે.ખેડૂત બબાભાઇ પૂંજાભાઇ ડાંગરે નોંધાવેલી ફરિયાદ પ્રમાણે ગામમાં વિરમભાઇ ડાંગરની દુકાને બેઠો હતો ત્યારે ગાડીમાં આવેલા શખ્સો પૈકી એક જણે આવીને કહ્યું કે, અહીં બિયર ક્યાં મળે છે, જેથી વિરમભાઇએ ફતેહગઢમાં માલ મળતો હોવાનું જણાવી બબાને આ લોકો સાથે ફતેહગઢ જવા જણાવ્યું હતું,

જ્યાંથી ફતેહગઢ ગામથી બહાર આવેલા માંજુવાસ રોડ પર એક છોકરો બિયર આપી ગયો, જે બાદ ગાડીમાં બેઠેલા શખ્સો પરત ફરતા હતા.દરમિયાન આડેસર પોલીસ સ્ટેશનથી થોડે દૂર ગાડી ધીમી પડતાં બબાએ દરવાજો ખોલીને છલાંગ મારી હતી, ત્યારે આડેસર પોલીસ આવી જતાં બબાની અને તેની સાથેના ચાર માણસોની પૂછપરછ કરી પોલીસ સ્ટેશને લઇ આવતાં તેઓના નામ કુલદિપસિંહ કિરિટસિંહ જાડેજા, જયપાલસિંહ પ્રવિણસિંહ પરમાર, જયપાલસિંહ ગોવુભા જાડેજા, રાજેન્દ્રસિંહ મનુભા જાડેજા હોવાનું ખૂલતાં પોલીસે સમગ્ર હકીકતો અંગે પૂછપરછ કર્યા બાદ ચારેય આરોપીઓને મુદ્દામાલ સાથે રાપર પોલીસને સોંપતાં પોલીસે અટક કરી લૂંટ અને અપહરણનો ગુનો દાખલ કર્યો હતો.

હાલ કચ્છ અને સૌરાષ્ટ્રમાં લમ્પી સ્કીન વાયરસના કારણે અસંખ્ય પશુધન અને ખાસ કરીને ગાયો મુશ્કેલીમાં મુકાયી છે, તેની તાત્કાલિક સારવાર કરવી ઘણી બધી કઠીન બની છે ત્યારે મૂંગા પશુધન અને ગાય માતાઓને આ વિનાશક મુશ્કેલીમાંથી ઉગારવા માટે હાલ છેક અમદાવાદ માલધારી સંસ્થા કચ્છમાં સારવાર માટે આવી છે.અમદાવાદથી માલધારી પેજ પરિવાર ટીમ પોતાની સાથે 5 નિષ્ણાંત ડોકટરોને લઇને કચ્છ અને તેની આસપાસના વિસ્તારમાં ગાયોની સારવાર માટે આવી પહોંચ્યા છે. આ ટીમ દ્વારા ધાણેટી, મમુઆરા, ડગાળા, ઝીક્ડી, હબાય વગેરે ગામ અને તેની આસપાસના વિસ્તારની લગભગ 400 થી વધારે ગાયોની સારવાર કરવામાં આવી.

આ મહા વિનાશક વાયરસની જપેટમાં આવેલી ગાયોની સારવાર માટે સતત 2 દિવસ થી માલધારી પેજ પરિવારની ટીમ વતી હેમરાજભાઈ રબારી, અશ્વિનભાઈ દેસાઈ તેમની સાથે 5 ડોકટરોની ટીમ સાથે આ કામગીરી કરવામાં આવી હતી. આ સેવાકીય યજ્ઞમાં ગાયોની સારવાર નો ખર્ચ અશ્વિનભાઈ (અમદાવાદ) તરફથી કરવામાં આવ્યો હતો. જેમને ગાયોને તરત સારવાર મળી રહે તે માટે દવાઓ અને બીજી વ્યવસ્થા કરી હતી. અને તેમની સાથે માલધારી સમાજના યુવાનોનો પણ આ કાર્યમાં આર્થીક સહયોગ મળેલ છે.

અબડાસાના જખૌ દરિયાઈ વિસ્તારમાંથી બીએસએફની ટીમને ચરસના 10 પેકેટ મળી આવ્યાં હતા. જખૌના કરમથા દરિયા કિનારેથી BSFને પેટ્રોલિંગ દરમ્યાન બિનવારસી હાલતમાં ચરસના પેકેટ મળી આવ્યાં હતા. આજે રવિવારે આશરે 10.30 કલાકે, BSF ભુજની એક પેટ્રોલિંગ ટીમે સરહદી જખૌના દરિયા કિનારે આવેલા કરમથાના વરાયા થાર બેટમાંથી ચરસના 10 પેકેટ બિનવારસી હાલતમાં જપ્ત કર્યા હતા.આ ઝડપાયેલા પેકેટના પેકેજિંગ પર ‘કોબ્રા બ્રાન્ડ કોહિનૂર બાસમતી ચોખા’ લખેલું છે.

અગાઉ પણ BSF, ગુજરાત પોલીસ, કોસ્ટ ગાર્ડ, કસ્ટમ્સે જખૌ કોસ્ટ અને ક્રીક વિસ્તારમાંથી ચરસના પેકેટો જપ્ત કર્યા છે.સલામતી દળની સત્તાવાર યાદી અનુસાર બીએસએફ અને અન્ય કાયદા અમલીકરણ એજન્સીઓ દ્વારા પ્રાપ્ત કરાયેલા આ ચરસના પેકેટ, પાકિસ્તાન તરફથી દરિયાઈ મોજા સાથે ધોવાઈ ગયા હોય અને ભારતીય કિનારે પહોંચ્યા હોય તેવું લાગે છે. 20મી મે 2020થી BSF અને અન્ય એજન્સીઓ દ્વારા 1516 પેકેટો રિકવર કરવામાં આવ્યા હોવાનું BSF ગુજરાત ફ્રન્ટિયરના જનસંપર્ક અધિકારીની યાદીમાં જણાવવામાં આવ્યું હતું.