ગુજરાત વિધાનસભાની સામાન્ય ચૂંટણી અંતર્ગત આણંદ જિલ્લાની 7 વિધાનસભા મતદાર વિભાગની ચૂંટણી સંદર્ભે બીજા તબક્કામાં આગામી તા. 5મી ડીસેમ્બરના રોજ મતદાન થનાર છે. જેને ધ્યાને લઈ આણંદ જિલ્લાના મતદાર વિભાગોમાં રહેલા મતદારોમાં મતદાન જાગૃત્તિ વધે તે માટે વિવિધ કાર્યક્રમો યોજવામાં આવી રહ્યા છે.

આણંદ જિલ્લા ચૂંટણી અધિકારી અને જિલ્લા કલેકટર ડી.એસ.ગઢવીના માર્ગદર્શન હેઠળ જિલ્લાના શહેરી વિસ્તારોની સાથે ગ્રામ્ય વિસ્તારોના મતદારોમાં પણ મતદાન પ્રત્યે જાગૃતિ કેળવાય તે માટે આણંદ જિલ્લાના તમામ મતદાર વિભાગોના વિવિધ ગ્રામ્ય વિસ્તારોમાં સ્વીપ અંતર્ગત મતદાર જાગૃતિના કાર્યક્રમો યોજવામાં આવી રહ્યા છે. આ કાર્યક્રમો અંતર્ગત તમામ મતદાર વિભાગોના 250 થી વધારે ગામડાઓના જાહેર નોટિસ બોર્ડ પર મતદાન જાગૃતિ અર્થે ગામના મતદાતાઓને આગામી તા. 5મી ડીસેમ્બરના રોજ મતદાન કરવા અપીલ કરવામાં આવી છે.

ગ્રામ્ય કક્ષાએ નોટિસ બોર્ડ ઉપર મૂકવામાં આવેલ મતદાર જાગૃતિ અર્થેના સંદેશાની વાત કરીએ તો, અજુપુરા ગામના નોટિસ બોર્ડ ઉપર મતદાન માટેની સુંદર વાત રજુ કરવામાં આવી છે. આ બોર્ડ ઉપર જાહેર જનતાને અપીલ કરતાં જણાવાયું છે કે, આથી ગામની જાહેર જનતાને જણાવવાનું કે, તા.5 ડિસેમ્બર 2022 ના રોજ લોકશાહીનાં ઉત્સવમાં આપનો કિંમતીમત આપવા જરૂર જઈએ.100 ટકા મતદાન કરીએ. મતદાન કરવું એ આપણી નૈતિક ફરજ છે. એ ફરજ બજાવીને લોકશાહીનો ‘‘અવસર’’ ઉજવીએ. હું છુ મતદાર… આળસ કરીશ નહી, ફરજથી ડગીશ નહી… મતદાન ચૂકીશ નહી.

જયારે મોગરી ગામના નોટિસ બોર્ડ ઉપર મતદારોને નમ્ર અપીલ કરતાં જણાવાયું છે કે, ‘‘સર્વે મોગરી ગ્રામજનોને નમ્ર અપીલ છે કે,આગામી વિધાનસભા સામાન્ય ચૂંટણી તા.5 ડિસેમ્બર 2022 ને સોમવારના રોજ હોય આપ સૌ અચૂક મતદાન કરવા જશો જ એવી નમ્ર વિનંતી છે.’’ ત્યાર પછી બાદ નીચે સરસ મજાનો મતદાર જાગૃતિનો સંદેશ પાઠવતા લખ્યુ છે, અવસર અનોખા ગુજરાતનો… અવસર આપણા સૌનો….. અવસર ગુજરાત વિધાનસભા ચૂંટણીઓ… અવસર લોકશાહીનો. મહત્વનું છે કે મતદાન જાગૃતિ અર્થેની આવી જ વાતો આણંદના અનેકવિધ ગામોમાં જોવા મળી છે. ગામડાઓ આજે મતદાન જાગૃતિની આહલેક જગાવી રહયાં છે.

વિધાનસભાની ચૂંટણી આગામી 1 અને 5 ડિસેમ્બરના રોજ યોજાનાર છે. છેલ્લી 6 ટર્મથી મતદાન માટે ઇવીએમ મશીન ઉપયોગ થઇ રહ્યો છે. ત્યારે વિવિધ રાજકીય પક્ષો દ્વારા આક્ષેપ કરવામાં આવી રહ્યાં છે. મતદાન મથક મતદાન પૂર્ણ થયા બાદ જે વાહનોમાં ઇવીએમઅને વીવીપેટ મશીન લઇ જવાય છે.

તે વાહનોને રાત્રિના સમયે રોકીને ઇવીએમ મશીન બદલી નાખવામાં આવતાં હોવાના આક્ષેપ ભૂતકાળમા થયા છે. તેને ધ્યાને લઇને ચૂંટણી પંચ દ્વારા આ સમસ્યાના નિવારણ માટે વિધાનસભાની ચૂંટણીમાં ઇવીએમ મશીનને લાવવા લઇ જવામાં ઉપયોગમાં લેવામાં આવનાર તમામ વાહનોમાં જીપીએસ સિસ્ટમ લગાવવામાં આવનાર છે.તેના પર નજર રાખવા માટે જિલ્લા કક્ષાએ જીપીએસ કંટ્રોલ રૂમ ઉભો કરવામાં આવનાર છે.

કંટ્રોલ રૂમમાં કલાસવન અધિકારી રહેશે
આણંદ ચૂંટણીપંચના સુત્રો મુજબ વિધાનસભા દીઠ અલગ અલગ વાહનનો ઉપયોગ કરવામાં આવનાર છે. તે તમામ વાહનોમાં જીપીએસ સિસ્ટમ લગાવવામાં આવી છે. આ વાહનો પર નજર રાખવા માટે કંટ્રોલ રૂમ જિલ્લા કલેકટર કચેરી ખાતે ઉભા ​​​​​​​કરવામાં આવ્યો છે. જે માટે એક કલાસવન અધિકારી નિમણુંક કરવામાં આવી છે.

આણંદ જીલ્લાની 7 વિધાનસભા ચુંટણી દરમિયાન ફરજ બજાવનાર કર્મચારીઓ સહિત પોલીસ જવાનો મતદાનથી વંચિત રહી જાય નહીં તે માટે આગામી 2 દિવસ દરમ્યાન પોસ્ટલ બ્લેટથી મતદાન યોજાશે.ત્યારે આણંદ જિલ્લામાં કુલ 2500 પોલીસ જવાનો અને 6 હજાર કર્મચારીઓ બેલેટથી મતદાન કરી પોતાની ફરજ નિભાવી શકે તે માટે ચુંટણી વિભાગે અત્યારથી તડામાર તૈયારીઓને આખરી ઓપ આપી દેવાયો છે.

પ્માપ્ત માહિતી અનુસાર આણંદ જિલ્લાની 7 વિધાનસભાની ચુંટણીમાં ફરજ બજાવતા પોલીસ અને કર્મચારીઓ માટે પોસ્ટલ બેલેટથી મતદાન કરીને પોતાની ફરજ બજાવશે. જેના ભાગરૂપે આણંદ જિલ્લા ચૂંટણી વિભાગ દ્વારા તા. 27મી નવેમ્બરે આણંદ સરદાર પટેલ હાઇસ્કુલમાં પોલીસ જવાનો મતદાન કરી શકે તેવી વ્યવસ્થાઓ ઉભી કરવામાં આવી દીધેલ છે.તેમજ જિલ્લામાં જુદા જુદા બુથ મથકો પર ફરજ બજાવતા 6 હજાર કર્મચારીઓ બેલેટથી મતદાન કરીને મતદાન કરી શકે તે માટે ડ્રોપ બોકસ મુકવામાં આવશે.

80 થી વધુ ઉંમર ધરાવતા અને દિવ્યાંગ મતદારો માટે પોસ્ટલ બેલેટ મતદાન
આણંદ વિધાનસભા 112 બેઠક પર ચૂંટણી અધિકારી ના માર્ગ દર્શન હેઠળ પોસ્ટલ બેલેટ થી મતદાન માટે આયોજન કરવામાં આવ્યું છે.આણંદ વિધાનસભા બેઠક ના ચૂંટણી અધિકારી વિપુલ ભાઈ બારોટ ના માર્ગદર્શન હેઠળ કે તેથી 80 વધુ ઉંમર ધરાવતા સિનિયર સિટીઝન અને દિવ્યાંગ મતદારો માટે બે દિવસ દરમ્યાન પોસ્ટલ બેલેટ થી મતદાન પ્રક્રિયા હાથ ધરવામાં આવનાર છે.પોસ્ટલ બેલેટ થી 13 જેટલા મતદારો મત કુટીર માં ગયા વિના ઘેર બેઠાં જ સૌ પ્રથમ વાર મતદાન કરશે