ભારતીય ક્રિકેટ કંટ્રોલ બોર્ડ અથવા બીસીસીઆઈએ શુક્રવારે સ્પષ્ટ કર્યું છે કે ઓલરાઉન્ડર હાર્દિક પંડ્યા ઈજાના કારણે ન્યૂઝીલેન્ડ સામેની આગામી મેચમાં નહીં રમે. તે 20મી ઓક્ટોબરે એટલે કે આજે ટીમ ઈન્ડિયા સાથે ધર્મશાલા જશે નહીં. હાર્દિક પંડ્યા હવે સીધો જ લખનૌમાં ભારતીય ટીમ સાથે જોડાશે જ્યાં તેનો મુકાબલો ડિફેન્ડિંગ ચેમ્પિયન ઈંગ્લેન્ડ સામે થશે. તમને જણાવી દઈએ કે, બાંગ્લાદેશ વિરૂદ્ધ પોતાના સ્પેલની પ્રથમ ઓવર ફેંકી રહેલા હાર્દિક પંડ્યા ત્રીજા બોલ પર ચોગ્ગો રોકવાનો પ્રયાસ કરતી વખતે ઈજાગ્રસ્ત થયો હતો. મેદાન પરના ફિઝિયોએ ટેપિંગ કર્યું અને ગરમ પટ્ટી લગાવી, પરંતુ તેનો કોઈ ફાયદો થયો નહીં. તે બોલિંગ કરવાનો પ્રયાસ કરતો જોવા મળ્યો હતો, પરંતુ પીડા ખૂબ જ હતી. આવી સ્થિતિમાં વિરાટ કોહલીએ પોતાની ઓવર પૂરી કરી. બાદમાં હાર્દિકને સ્કેન માટે પણ લઈ જવામાં આવ્યો હતો.
BCCIએ શુક્રવારે એક પ્રેસ રિલીઝ જારી કરીને કહ્યું કે, ‘ટીમ ઈન્ડિયાના વાઇસ કેપ્ટન હાર્દિક પંડ્યાને પુણેના મહારાષ્ટ્ર ક્રિકેટ એસોસિએશન સ્ટેડિયમમાં બાંગ્લાદેશ સામેની ભારતની મેચ દરમિયાન પોતાની બોલિંગ પર ફિલ્ડિંગ કરતી વખતે ડાબા પગની ઘૂંટીમાં ઈજા થઈ હતી. ઓલરાઉન્ડરને સ્કેન માટે લઈ જવામાં આવ્યો હતો અને તેને આરામની સલાહ આપવામાં આવી છે. તે BCCIની મેડિકલ ટીમની સતત દેખરેખ હેઠળ રહેશે.
અખબારી યાદીમાં વધુ માહિતી આપવામાં આવી છે, ‘તે 20 ઓક્ટોબરે ધર્મશાલા માટે ટીમ સાથે ઉડાન ભરશે નહીં અને હવે સીધા લખનૌમાં ટીમ સાથે જોડાશે જ્યાં ભારત ઈંગ્લેન્ડ સામે રમશે.’
🚨 NEWS 🚨
Medical Update: Hardik Pandya 🔽 #CWC23 | #TeamIndiahttps://t.co/yiCbi3ng8u
— BCCI (@BCCI) October 20, 2023
ન્યૂઝીલેન્ડ સામેની મોટી મેચ પહેલા હાર્દિક પંડ્યાનું ઈજાના કારણે બહાર થવું ટીમ ઈન્ડિયા માટે મોટો ઝટકો છે. અત્યાર સુધી હાર્દિક પંડ્યા ટીમમાં ત્રીજા ફાસ્ટ બોલર અને ફિનિશરની ભૂમિકા ભજવતો હતો. તેની ઈજા બાદ, ભારત પાસે હાર્દિક માટે કોઈ લાઈક ટુ લાઈક રિપ્લેસમેન્ટ નથી. આવી સ્થિતિમાં ટીમ ઈન્ડિયાએ ધર્મશાલામાં બેટિંગ કે બોલિંગમાં સમાધાન કરવું પડશે.
હાર્દિક પંડ્યાના સ્થાને પ્લેઈંગ 11માં ત્રણ ખેલાડીઓ મોહમ્મદ શમી, આર અશ્વિન અને સૂર્યકુમાર યાદવને સ્થાન આપવામાં આવી શકે છે. શમીના આગમનથી બોલિંગ આક્રમણ મજબૂત થશે, પરંતુ બેટિંગમાં ઊંડાણ ઘટશે. ધર્મશાલાની પીચ સ્પિનરો માટે યોગ્ય નથી. આવી સ્થિતિમાં ભારતે બેલેન્સ બનાવવા માટે બે ફેરફાર કરવા પડશે. હાર્દિક પંડ્યાના સ્થાને સૂર્યકુમાર યાદવને તક આપવી પડશે અને શાર્દુલ ઠાકુરની જગ્યાએ મોહમ્મદ શમીને તક આપવી પડશે. આ સ્થિતિમાં ટીમ ઈન્ડિયા પંડ્યાની કમી પૂરી કરી શકે છે.
