ઉત્તર ભારતના ઘણા વિસ્તારો આ દિવસોમાં ગાઢ ધુમ્મસનો સામનો કરી રહ્યા છે. ખાસ કરીને સવારે ધુમ્મસની અસર થોડી વધી જાય છે. હવામાન વિભાગનું કહેવું છે કે આગામી 3-4 દિવસ સુધી ધુમ્મસથી કોઈ રાહત નહીં મળે. ભારતીય હવામાન વિભાગ દ્વારા જારી કરવામાં આવેલા એક નિવેદનમાં કહેવામાં આવ્યું છે કે, ‘ઉત્તર પરવુ અને મધ્ય ભારતમાં આગામી ત્રણ-ચાર દિવસ સુધી ગાઢથી ખૂબ ગાઢ ધુમ્મસ જોવા મળી શકે છે.’ IMD એ મંગળવારે સેટેલાઇટ ઇમેજ જાહેર કરી જેમાં પંજાબ, હરિયાણા, દિલ્હી, ઉત્તર પ્રદેશ અને મધ્ય પ્રદેશ ધુમ્મસમાં ડૂબેલા જોવા મળે છે.
વિભાગ દ્વારા કહેવામાં આવ્યું છે કે પંજાબ, હરિયાણા, દિલ્હી અને પશ્ચિમ ઉત્તર પ્રદેશમાં લઘુત્તમ તાપમાન 6-10 ડિગ્રી સેલ્સિયસની વચ્ચે રહેવાનું છે. આ સિવાય રાજસ્થાન, પૂર્વી યુપી, મધ્યપ્રદેશ અને ઝારખંડમાં લઘુત્તમ તાપમાન 11-12 ડિગ્રી સેલ્સિયસની વચ્ચે રહેશે. IMD કહે છે કે મંગળવારે દેશના મોટાભાગના ભાગોમાં લઘુત્તમ તાપમાન સામાન્ય અથવા સામાન્ય કરતાં થોડું વધારે રહેશે. જો રાજધાની દિલ્હીની વાત કરીએ તો આજે અહીં ગાઢ ધુમ્મસ છવાયું હતું અને સવારે લઘુત્તમ તાપમાન 7 ડિગ્રી સેલ્સિયસ નોંધાયું હતું. ઈન્ડિયા ગેટ, એઈમ્સ અને આનંદ વિહારની આસપાસના રસ્તાઓ ધુમ્મસની ચાદરમાં લપેટાયેલા જોવા મળ્યા હતા.
ગાઢ ધુમ્મસ ફેફસાને અસર કરી શકે છે
IMD એ દિલ્હી-NCRમાં ગાઢ ધુમ્મસને કારણે લોકોના સ્વાસ્થ્ય પર પડી રહેલી અસર અંગે ચેતવણી જારી કરી છે. સોમવારે જારી એક પ્રેસ રિલીઝમાં કહેવામાં આવ્યું છે કે, ‘ગાઢ ધુમ્મસમાં રજકણ અને અન્ય પ્રદૂષકો હોય છે. વ્યક્તિના ફેફસામાં આના જમા થવાનો ભય રહે છે. આ ફેફસાને અસર કરે છે, તેમની કાર્ય કરવાની ક્ષમતા ઘટાડે છે. આવી સ્થિતિમાં ઘરઘરાટી, ઉધરસ અને શ્વાસ લેવામાં તકલીફ વધી શકે છે. હવામાન વિભાગે કહ્યું કે ધુમ્મસને કારણે આંખના પટલમાં બળતરાની લાગણી થઈ શકે છે. તેના કારણે આંખોમાં ઈન્ફેક્શન અને લાલાશ કે સોજો આવવાનો ખતરો રહે છે.
