બોલીવુડ અભિનેત્રી કંગના રનૌત આજે દશેરા નિમિત્તે રાજધાની દિલ્હીના લાલ કિલ્લા ખાતે યોજાનારી પ્રખ્યાત લવ કુશ રામલીલામાં રાવણનું દહન કરશે. દર વર્ષે આયોજિત આ ઈવેન્ટના 50 વર્ષના ઈતિહાસમાં પહેલીવાર એવું બનશે કે જ્યારે કોઈ મહિલા તીર મારીને રાક્ષસ રાજા રાવણના પૂતળાનું દહન કરશે.
કંગનાએ ઈન્સ્ટાગ્રામ પર એક વીડિયો શેર કરીને આની જાહેરાત કરી છે. તેણે વીડિયોના કેપ્શનમાં લખ્યું છે કે, “લાલ કિલ્લા પર દર વર્ષે આયોજિત ઈવેન્ટના 50 વર્ષના ઈતિહાસમાં આ પહેલીવાર હશે જ્યારે કોઈ મહિલા રાવણના પૂતળાને અગ્નિદાહ આપશે. જય શ્રી રામ.”
આ અંગે માહિતી આપતા લવ કુશ રામલીલા સમિતિના અધ્યક્ષ અર્જુન સિંહે જણાવ્યું કે, સંસદમાંથી મહિલા આરક્ષણ બિલને મળેલી મંજૂરીને ધ્યાનમાં રાખીને રામલીલા સમિતિએ આ નિર્ણય લીધો છે. સિંહે કહ્યું કે ફિલ્મ સ્ટાર હોય કે રાજનેતા, દર વર્ષે અમારી ઈવેન્ટમાં વીઆઈપી હાજર હોય છે.
તેમણે કહ્યું કે ફિલ્મ સ્ટાર હોય કે રાજનેતા, દર વર્ષે અમારી ઈવેન્ટમાં એક વીઆઈપી હાજર રહે છે. ભૂતકાળમાં પૂર્વ રાષ્ટ્રપતિ રામનાથ કોવિંદ અને વડાપ્રધાન નરેન્દ્ર મોદી પણ આ કાર્યક્રમમાં હાજરી આપી ચૂક્યા છે. ભૂતકાળમાં, ફિલ્મ અભિનેતા અજય દેવગન અને જ્હોન અબ્રાહમે પણ આ ઇવેન્ટમાં ભાગ લીધો હતો. ગયા વર્ષે પ્રભાસે રાવણનું દહન કર્યું હતું. આ વખતે, અમારી ઇવેન્ટના 50 વર્ષમાં પ્રથમ વખત, કોઈ મહિલા રાવણ દહન કરશે.
અર્જુન સિંહે ન્યૂઝ એજન્સી ANIને જણાવ્યું કે સામાન્ય રીતે દેશના વડાપ્રધાન રાવણ દહન કરે છે પરંતુ આ વર્ષે PM નરેન્દ્ર મોદી ચૂંટણીમાં વ્યસ્ત હોવાથી લવ કુશ રામલીલા કમિટીએ કંગનાને આમંત્રણ આપવાનો નિર્ણય કર્યો છે. જો કે, લેફ્ટનન્ટ ગવર્નર વીકે સક્સેના અને દિલ્હીના મુખ્યમંત્રી અરવિંદ કેજરીવાલ પણ આ કાર્યક્રમમાં હાજરી આપશે.
ગયા મહિને સંસદ દ્વારા પસાર કરાયેલ મહિલા અનામત બિલ, લોકસભા અને રાજ્યની વિધાનસભાઓમાં મહિલાઓ માટે 33 ટકા બેઠકો સુનિશ્ચિત કરે છે. સિંહે કહ્યું કે લવ કુશ રામલીલા કમિટી પણ મહિલાઓ માટે સમાન અધિકાર ઇચ્છે છે. આજે જીવનના દરેક ક્ષેત્રમાં મહિલાઓની ભાગીદારી વધી રહી છે, પરંતુ હજુ ઘણી લાંબી મજલ કાપવાની છે. આ બિલ દેશ અને સમાજના વિકાસમાં મદદ કરશે. તેમણે કહ્યું કે સમાનતા લાવવા માટે સંકુચિત માનસિકતા દૂર કરવાની જરૂર છે.
અર્જુન સિંહે કહ્યું કે હવે એક મહિલા પણ રાવણના પૂતળાને આગ લગાવી શકે છે, તે બુરાઈનો પણ નાશ કરી શકે છે. મહિલાઓને પણ આ અધિકાર મળવો જોઈએ અને તેથી જ અમે આ માટે કંગના જીને પસંદ કરી છે.
ઉલ્લેખનીય છે કે કંગના રનૌત હાલમાં તેની ફિલ્મ ‘તેજસ’નું પ્રમોશન કરી રહી છે, જે શુક્રવારે રિલીઝ થઈ રહી છે. સર્વેશ મેવાડા દ્વારા લખાયેલ અને દિગ્દર્શિત આ ફિલ્મમાં તે ભારતીય વાયુસેનાના પાયલટની ભૂમિકા ભજવે છે.
