ભારતીય ટીમે એશિયા કપ 2023ના સુપર 4ની બીજી મેચમાં શ્રીલંકાને 41 રને હરાવ્યું છે. આ જીત સાથે ટીમ ઈન્ડિયાએ પણ ફાઇનલમાં જગ્યા બનાવી લીધી છે. આ ટુર્નામેન્ટની ફાઇનલ મેચ 17 સપ્ટેમ્બરે રમાશે. પાકિસ્તાન અને શ્રીલંકા વચ્ચે 14 સપ્ટેમ્બરે રમાનારી મેચની વિજેતા ટીમ ફાઇનલમાં જગ્યા બનાવી શકે છે. આ મેચની વાત કરીએ તો ભારતે 213 રન બનાવ્યા હતા. જવાબમાં શ્રીલંકાની ટીમ 172 રનમાં સમેટાઈ ગઈ હતી. આ મેચમાં પણ ટીમ ઈન્ડિયાની જીતનો હીરો બન્યો કુલદીપ યાદવ. સોમવારે તેણે પાકિસ્તાન સામે પાંચ વિકેટ લીધી હતી અને હવે આજે તેણે શ્રીલંકા સામે 9.3 ઓવરમાં 43 રન આપીને 4 વિકેટ લીધી છે.
ભારતીય ટીમે સુપર 4ની પ્રથમ મેચમાં પાકિસ્તાન સામે 228 રનથી શાનદાર જીત નોંધાવી હતી. આ મેચમાં ભારતીય બેટ્સમેનોએ શાનદાર પ્રદર્શન કર્યું હતું. શ્રીલંકા સામે બેટિંગ થોડી ઢીલી પડી હતી પરંતુ બોલરોએ પાકિસ્તાન બાદ શ્રીલંકાના બેટ્સમેનોને પરેશાન કર્યા હતા. આ મેચમાં કુલદીપ યાદવની 4 વિકેટ ઉપરાંત રવિન્દ્ર જાડેજા અને જસપ્રિત બુમરાહે 2-2 વિકેટ ઝડપી હતી. જ્યારે હાર્દિક પંડ્યા અને મોહમ્મદ સિરાજને એક-એક સફળતા મળી હતી.
શું હતી ટીમ ઈન્ડિયાની ઈનિંગ્સની હાલત?
આ મેચમાં ટીમ ઈન્ડિયા ટોસ જીતીને પ્રથમ બેટિંગ કરવા આવી હતી. પરંતુ શ્રીલંકાના ખેલાડીઓની સામે ટીમ ઈન્ડિયા માત્ર 213 રનમાં ઓલઆઉટ થઈ ગઈ હતી. શ્રીલંકા તરફથી વેલ્લાલેગે 5 અને ચરિથ અસલંકાએ 4 વિકેટ ઝડપી હતી. મહિષ તિક્ષાનાને એક વિકેટ મળી હતી. ભારતની બેટિંગની વાત કરીએ તો શરૂઆતની વિકેટ માટે 80 રનની ઝડપી ભાગીદારી બાદ ટીમનો દાવ ખોરવાઈ ગયો હતો અને 91 રનમાં ત્રણ વિકેટ પડી ગઈ હતી. રોહિતે 53 રનની શાનદાર ઇનિંગ રમી હતી. આ પછી ભારતે કેએલ રાહુલ અને ઈશાન કિશનના દમ પર ચોથી વિકેટ માટે 63 રન જોડીને પુનરાગમન કરવાનો પ્રયાસ કર્યો હતો. પરંતુ ફરી એકવાર વેલ્લાલેજે 30મી ઓવરમાં રાહુલની વિકેટ લઈને ભારતને મજબૂત સ્થિતિમાં આવવા દીધું નહીં. તેણે હાર્દિક પંડ્યાને પણ આઉટ કરીને દિવસની તેની પાંચમી વિકેટ લીધી અને પછી ઈશાન પણ ચરિથ અસલંકાની ઓવરમાં આઉટ થયો. આ પછી અસલંકાએ વધુ 3 વિકેટ લઈને ભારતના મિડલ ઓર્ડરને ધ્વસ્ત કરી દીધો હતો.
પોઈન્ટ ટેબલ પર એક નજર
હવે એશિયા કપ 2023ના સુપર 4ના પોઈન્ટ ટેબલ પર નજર કરીએ તો ટીમ ઈન્ડિયાએ બે મેચમાં બે જીત બાદ ચાર પોઈન્ટ હાંસલ કર્યા છે. તેનો નેટ રન રેટ પણ ઉત્તમ 2.690 છે. જ્યારે શ્રીલંકા અને પાકિસ્તાન એક-એક જીત અને હાર બાદ 2-2 પોઈન્ટ સાથે અનુક્રમે ત્રીજા અને ચોથા સ્થાને છે. શ્રીલંકાની નેટ રન રેટ -0.2 છે. જ્યારે પાકિસ્તાનનો નેટ રન રેટ ખૂબ જ ખરાબ છે -1.892. બાંગ્લાદેશની ટીમ હવે સુપર 4ની બંને મેચ હારીને ટૂર્નામેન્ટમાંથી બહાર થઈ ગઈ છે. ટીમ ઈન્ડિયા હવે તેની છેલ્લી સુપર 4 મેચ 15 સપ્ટેમ્બરે બાંગ્લાદેશ સામે રમશે. રોહિત શર્મા આ મેચમાં પોતાની બેન્ચ સ્ટ્રેન્થ અજમાવી શકે છે.
The post ભારતે શ્રીલંકાને હરાવી એશિયા કપ 2023ની ફાઇનલમાં જગ્યા બનાવી, જીતનો હીરો બન્યો કુલદીપ યાદવ. appeared first on The Squirrel.
