ગુજરાતમાં કોરોના વાયરસની મહામારી વચ્ચે રાજ્યમાં ધોરણ-10 અને 12નું પરિણામ ઓનલાઇન જાહેર કરી દેવામાં આવ્યું હતું. ત્યારે પરિણામ જાહેર કરાયા બાદ માર્કશીટ માટે નવી તારીખ જાહેર કરવામાં આવશે તેવું જણાવામાં આવ્યું હતુ.
રાજ્યમાં લેવામાં આવેલી ધોરણ-10ની પરીક્ષાની માર્કશીટ 22 જૂનના રોજ શાળામાંથી આપવામાં આવશે. જો કે વિદ્યાર્થીઓને સ્કૂલમાં માર્કશીટ લેવા આવતા સમયે સોશિયલ ડિસ્ટન્સિંગનું પાલન કરવાનું રહેશે.
મળતી માહિતી મુજબ કોરોના મહામારીને પગલે ધોરણ-10 અને ધોરણ-12ની પરીક્ષાનું પરિણામ આ વર્ષે માત્ર ઓનલાઈન જ જાહેર કરવામાં આવ્યું હતું. વિદ્યાર્થીઓને શાળામાંથી માર્કશીટ આપવા નહતી આવી. પરંતુ હવે શિક્ષણ બોર્ડે માર્કેશીટ વિતરણની તારીખ નક્કી કરી છે. જેમા ધોરણ-10ના વિદ્યાર્થીઓને 22 જૂનના રોજ શાળામાંથી માર્કશીટ આપવામાં આવશે. ધોરણ-12 માટે આગામી સમયમાં તારીખ જાહેર કરવામાં આવશે.
ધોરણ-10ની માર્કશીટ રાજ્યના શિક્ષણ બોર્ડ દ્વારા આગામી 20 જૂને સ્કૂલમાં મોકલવામાં આવશે. આ સાથે દરેક સ્કૂલ સોશિયલ ડિસ્ટન્સ જળવાય રહે તે રીતે વિદ્યાર્થીઓને બોલવાશે. જેમાં સ્કૂલ દ્વારા 10-10ના ગ્રુપમાં માર્કશીટ વિતરણ કરવામાં આવશે. આગામી 22 જૂને સોમવારે વહેલી સવારથી માર્કશીટનું વિતરણ કરવામાં આવશે.
