ગુજરાતમાં પાછલા પાંચ વર્ષનો સૌથી ઓછો વરસાદ આ વર્ષે રહ્યો છે. જેને કારણે ખેડૂતોથી લઇ ગ્રુહિણીઓ મુજવણમાં મુકાયા હતા. ઓછા વરસાદને કારણે રાજ્યમાં દુષ્કાળના ભણકારા વાગી રહ્યા હતા. જોકે, ગઈકાલે સરકારે લોકોની ચિંતા દૂર કરીને કહ્યું કે આપણી પાસે પીવાના પાણીનો પુરતો સ્ટોક છે અને આ પછી પણ જો સરદાર સરોવર ડેમમાં પાણી રહેશે તો નર્મદા કેનાલ દ્વારા સિંચાઈ માટે પાણી પહોંચાડાશે. બીજી તરફ વરસાદની અછત વચ્ચે હવામાન વિભાગ દ્વારા સારા સમાચાર આપ્યા છે કે અમદાવાદ સહિત રાજ્યમાં ચાલુ મહિનાના અંત ભાગમાં વરસાદની આગાહી કરવામાં આવી છે. જેમાં દક્ષિણ ગુજરાતમાં તોફાની વરસાદ થવાની સંભાવના પણ વ્યક્ત કરવામાં આવી છે. હવામાન વિભાગ દ્વારા પાંચ દિવસ વરસાદ પડવાની આગાહી કરવામાં આવી છે. તેમાં આજે ગુજરાતના વલસાડ, નવસારી, ડાંગ, સુરત, તાપી, નર્મદામાં હળવો વરસાદ થવાની શક્યતાઓ વ્યક્ત કરવામાં આવી છે. જ્યારે મહિનાના અંતમાં અમદાવાદ સહિત મધ્ય ગુજરાતના કેટલાક ભાગોમાં વરસાદ થઈ શકે છે.
30 અને 31 તારીખની આગાહી જોઇએતો આ દરમિયાન રાજ્યના દક્ષિણ ભાગમાં ભારેથી અતિભારે વરસાદ થઈ શકે છે. જેમાં અમદાવાદ સહિત રાજ્યના વડોદરા, ભરુચ, છોટા ઉદેપુર, સુરત, વલસાડમાં હળવો વરસાદ રહેવાની આગાહી છે. આ સિવાય વલસાડ, નવસારી અને ડાંગમાં ધોધમાર વરસાદ થવાની સંભાવના વ્યક્ત કરવામાં આવી છે. જો વર્ષ 2020 અને 2019 સાથે સરખામણી કરવામાં આવે તો આ દરમિયાન અનુક્રમે 543mm અને 400mm વરસાદ થયો હતો. GSDMAના આંકડા પ્રમાણે આ પાછલા પાંચ વર્ષનું રાજ્યનું સૌથી નબળું ચોમાસું સાબિત થયું છે. આ વર્ષે ચોમાસું નબળું રહેતા ખેડૂતો ચિંતિત બન્યા છે જોકે, પીવાના પાણીની સમસ્યા નહીં રહેવાનો દાવો રાજ્ય સરકાર દ્વારા કરવામાં આવ્યો છે. ઉત્તર ભારત કેટલાક રાજ્યોને બાદ કરતા મધ્ય ભારતના મધ્યપ્રદેશ, મહારાષ્ટ્રમાં પણ ઓછો વરસાદ નોંધાયો છે. મધ્યપ્રદેશમાં ઓછો વરસાદ થવાથી નર્મદા નદીમાં આવતા નવા નીરમાં ઘટાડો થયો છે.
હવામાન વિભાગની મોટી આગાહી; રાજ્યમાં અગામી ૫ દિવસ વરસાદ પડશે ગુજરાત
