સુશાંત સિંહ રાજપૂતના મોતના મામલામાં ડ્રગ્સ એન્ગલની તપાસ કરનારી નારકોટિક્સ કન્ટ્રોલ બ્યૂરો (NCB)એ શુક્રવારે મુંબઈની NDPS કોર્ટમાં ચાર્જશીટ ફાઇલ કરી છે. 30 હજાર પાનાની ચાર્જશીટમાં દીપિકા પાદુકોણ, સારા અલી ખાન અને શ્રદ્ધા કપૂરના નિવેદન પણ જોડવામાં આવ્યા છે.

પાંચ આરોપી ફરાર ગણાવવામાં આવ્યા છે, જ્યારે રિયા ચક્રવર્તી અને તેના ભાઈ શોવિક ચક્રવર્તી મુખ્ય આરોપી છે. એનસીબી મુંબઇ યુનિટ બોલિવૂડ ડ્રગ્સ કનેક્શન કેસમાં આજે પહેલી વાર ચાર્જશીટ કોર્ટમાં રજૂ કરી છે.

સુશાંત સિંહ કેસની તપાસ દરમિયાન ઇડીને ડ્રગ્સ સાથે જોડાયેલી ચેટ મળી હતી. જે બાદ ઇડીએ તે ચેટ એનસીબીને સોંપી હતી. જે બાદ કેસમાં એનસીબીની એન્ટ્રી થઇ અને તપાસનો ધમધમાટ શરૂ થયો હતો.

એનસીબીની ચાર્જશીટમાં રિયા ચક્રવર્તી સહિત કુલ ૩૩ લોકોના નામ આરોપી તરીકે છે. આમાં રિયા, શોવિક, દીપેશ સાવંત, સેમુઅલ મિરાંડા અને ક્ષિતિજ પ્રસાદના નામ છે. ઉપરાંત પકડાયેલા ડ્રગ્સ પેડલર સહિત રિયાની નજીકના અને કેટલાક ડ્રગ્સ પેડલર સપ્લાયરના નામ પણ ચાર્જશીટમાં સામેલ કરાયા છે.

સુપ્રીમ કોર્ટે ગુરુવારે ઓવર ધી ટોપ અર્થાત OTT પ્લેટફોર્મ પર રજૂ કરાતા કન્ટેન્ટનું સ્ક્રીનિંગ જરૂરી હોવાનું ગણાવતા કહ્યું કે, અમુક પ્લેટફોર્મ ઉપર પોર્ન પણ દર્શાવવામાં આવી રહ્યું છે. સુપ્રીમ કોર્ટે જણાવ્યું કે આ પ્રકારના કાર્યક્રમોની દેખરેખ માટે વ્યવસ્થાની જરૂર છે.

સુપ્રીમ કોર્ટે કેન્દ્ર સરકારને સોશિયલ મીડિયા પ્લેટફોર્મ્સના નિયમન માટે તૈયાર ગાઈડલાઈન રજૂ કરવા જણાવ્યું છે. વેબસીરિઝ તાંડવ વિરુદ્ધ ચાલી રહેલા કેસમાં અલ્હાબાદ હાઈકોર્ટના ચુકાદા વિરુદ્ધ એમેઝોનના ઈન્ડિયા હેડ અપર્ણા પુરોહિત દ્વારા દાખલ કરાયેલી અરજી પર સુનાવણી દરમિયાન જસ્ટિસ અશોક ભૂષણે જણાવ્યું કે, ઈન્ટરનેટ અને ઓટીટી પર મૂવી જોવું હવે સામાન્ય થઈ ગયું છે.

આવા પ્લેટફોર્મ પર પોર્ન પણ દર્શાવવામાં આવે છે. બેન્ચે સોલિસિટર જનરલ તુષાર મહેતાને તાજેતરમાં સોશિયલ મીડિયા માટે તૈયાર ગાઈડલાઈન રજૂ કરવા જણાવ્યું હતું. સુનાવણી દરમિયાન સુપ્રીમ કોર્ટમાં પુરોહિત વતી હાજર રહેલા વરિષ્ઠ વકીલ મુકુલ રોહતગીએ જણાવ્યું કે તેમના અસીલ વિરુદ્ધ લગભગ 10 કેસ દાખલ કરવામાં આવ્યા છે, જ્યારે તેઓ એક કર્મચારી છે અને તેઓ પ્રોડ્યુસર નથી જે ઓટીટી પ્લેટફોર્મ્સ પર વેબ સીરિઝનું સ્ટ્રીમિંગ કરે છે.

છેલ્લા કેટલાક સમયથી એવા અહેવાલ સામે આવી રહ્યા હતા કે,  બોલીવુડ અભિનેતા આમિર ખાન ”મહાભારત” પર આધારિત ફિલ્મ બનાવવા જઈ રહ્યા છે. ત્યારબાદ ખબર સામે આવી કે આ ફિલ્મ સિરીઝ તરીકે બનાવવામાં આવશે અને ઓટીટી પ્લેટફોર્મ પર કેટલાક ભાગમાં રિલીઝ કરવામાં આવશે.

પરંતુ હવે આમિર ખાને પોતાના ડ્રીમ પ્રોજેક્ટ મહાભારતને કરવાનો ઇનકાર કરી દીધો છે. આ અંગે સ્પોટબોય પર અહેવાલ પ્રકાશિત થયા છે જે મુજબ , મહાભારત પ્રોજેક્ટ હાલ ઠપ પડી ગયો છે.

અભિનેતા સાથે સંકળાયેલા સૂત્રોએ કહ્યું કે, સારા અને ખરાબને જોતા આમિર ખાને ‘મહાભારત’  નહીં બનાવવાનો નિર્ણય લીધો છે. તે કોઈપણ માટે બિનજરૂરી વિવાદાસ્પદ હોઈ શકે છે. વધુ મહત્વની વાત એ છે કે, તેમણે આ પ્રોજેક્ટ બનાવવાની યોજના જે સ્કેલ પર કરી હતી તે વ્યાવસાયિક ધોરણે એટલું વ્યવહારિક નહોતી. તેમ જ ‘મહાભારત’ માટે તેમના કિંમતી સમયના પાંચ વર્ષોને અલગ રાખવાનો અર્થ છે કે તેના હાથમાંથી ઓછામાં ઓછી ત્રણ ફીચર ફિલ્મો ગુમાવવી. તેથી ‘મહાભારત’ બનાવશે નહીં.