વિરાટ કોહલીએ ઇન્સ્ટાગ્રામની કમાણી પર તોડ્યું મૌન, ટ્વિટ કરીને કરી સ્પષ્ટતા

શુક્રવારે ભારતીય સ્ટાર બેટ્સમેન વિરાટ કોહલીને લઈને એક રિપોર્ટ સામે આવ્યો હતો, જેમાં કહેવામાં આવ્યું હતું કે કિંગ કોહલી ઈન્સ્ટાગ્રામ પર એક પોસ્ટ માટે 11.45 કરોડ રૂપિયા ચાર્જ કરે છે. જોકે, આ સમાચાર વાયરલ થયાના એક દિવસ બાદ વિરાટે પોતાનું મૌન તોડ્યું હતું. કોહલીએ ટ્વીટ કરીને આ અહેવાલને ખોટો ગણાવ્યો છે. તમને જણાવી દઈએ કે, વિરાટ કોહલી વેસ્ટ ઈન્ડિઝના પ્રવાસ પર વનડે સીરીઝ બાદ સ્વદેશ પરત ફર્યો છે. અહીં થોડા દિવસ આરામ કર્યા બાદ તે એશિયા કપ 2023 માટે ટીમ સાથે શ્રીલંકા જશે.

વિરાટ કોહલીએ ટ્વીટ કર્યું, ‘જો કે જીવનમાં મને જે પણ મળ્યું છે તેનો હું આભારી અને ઋણી છું, પરંતુ મારી સોશિયલ મીડિયાની કમાણી વિશે ચાલી રહેલા સમાચાર સાચા નથી.’

Hopper HQના લેટેસ્ટ રિપોર્ટમાં એવો દાવો કરવામાં આવ્યો છે કે વિરાટ કોહલી ઈન્સ્ટાગ્રામ પર સૌથી વધુ કમાણી કરનાર ક્રિકેટર છે. રિપોર્ટ અનુસાર, જો આપણે એકંદરે વાત કરીએ તો, રોનાલ્ડો અને મેસી ઇન્સ્ટાગ્રામ પર પોસ્ટથી સૌથી વધુ કમાણી કરવાના મામલે નંબર-1 અને નંબર-2 પર છે. જ્યારે ત્રીજા નંબર પર સેલેના ગોમેઝ છે. આ યાદીમાં વિરાટ બાદ બીજું ભારતીય નામ પ્રિયંકા ચોપરાનું છે. આ યાદીમાં પ્રિયંકા ચોપરા 29માં નંબરે છે. પ્રિયંકા ચોપરાની એક ઇન્સ્ટાગ્રામ પોસ્ટની કિંમત લગભગ 4.4 કરોડ રૂપિયા છે.

While I am grateful and indebted to all that I’ve received in life, the news that has been making rounds about my social media earnings is not true. 🙏

— Virat Kohli (@imVkohli) August 12, 2023

રિપોર્ટ અનુસાર, ઈન્સ્ટાગ્રામ પર એક પોસ્ટથી સૌથી વધુ કમાણી કરનારા એથ્લેટ્સમાં ટોપ-25માં માત્ર બે ક્રિકેટર સામેલ છે. આ યાદીમાં વિરાટ ઉપરાંત એબી ડી વિલિયર્સનું નામ પણ સામેલ છે. એબી ડી વિલિયર્સ એથ્લેટ્સની યાદીમાં 22મા સ્થાને છે. એબીડીની એક ઇન્સ્ટાગ્રામ પોસ્ટની કિંમત લગભગ 1 કરોડ રૂપિયા છે.