ટીમ ઈન્ડિયા હાલ વેસ્ટ ઈન્ડિઝના પ્રવાસે છે. બે મેચની ટેસ્ટ અને ત્રણ મેચની વનડે સિરીઝનો અંત આવી ગયો છે. ભારતે ટેસ્ટ શ્રેણી 1-0થી જ્યારે વનડે શ્રેણી 2-1થી જીતી હતી. રોહિત શર્માએ ટેસ્ટ શ્રેણીની બંને મેચો અને વનડે શ્રેણીની પ્રથમ મેચમાં પણ કેપ્ટનશીપ સંભાળી હતી, પરંતુ છેલ્લી બે વનડેમાં રોહિત અને પૂર્વ કેપ્ટન વિરાટ કોહલી બંનેને પ્લેઈંગ ઈલેવનમાંથી બહાર બેસવું પડ્યું હતું. પ્રથમ વનડેમાં બંને પ્લેઈંગ ઈલેવનનો ભાગ હતા, પરંતુ રોહિત સાતમા નંબર પર બેટિંગ કરવા ઉતર્યો, જ્યારે વિરાટને બેટિંગ કરવાની તક પણ ન મળી. આ વનડે સીરીઝમાં ટીમ ઈન્ડિયાએ પહેલી જ મેચથી અલગ-અલગ પ્રયોગો કર્યા, તે પણ બેટ્સમેનમાં ઘણા બધા પ્રયોગો થયા. જ્યારે રોહિત અને વિરાટ બીજી અને ત્રીજી વનડેમાં રમ્યા ન હતા, ત્યારે ચાહકોએ ભારતીય ક્રિકેટ કંટ્રોલ બોર્ડ (BCCI) અને ટીમ મેનેજમેન્ટ પર આકરા પ્રહારો કર્યા હતા. ચાહકોએ કહ્યું કે જ્યારે આ બંને રમવાના નહોતા તો પછી તેમને ટીમ સાથે કેમ રાખવામાં આવ્યા? હવે એક ખાસ કારણ સામે આવ્યું છે. વાસ્તવમાં આ શ્રેયસ અય્યર અને કેએલ રાહુલના કારણે થયું છે, ચાલો સમજીએ કે ટીમ મેનેજમેન્ટે આવો નિર્ણય કેમ લીધો.
અગાઉ, રોહિત અને વિરાટ એશિયા કપ અને વર્લ્ડ કપની તૈયારી માટે શ્રેણીની ત્રણેય મેચ રમવાના હતા, પરંતુ ટીમ મેનેજમેન્ટને કેએલ રાહુલ અને શ્રેયસ ઐયરના ફિટનેસ રિપોર્ટની જાણ થતાં જ રણનીતિ બદલાઈ ગઈ. 21 જુલાઈના રોજ, બીસીસીઆઈએ કેએલ રાહુલ, શ્રેયસ ઐયર, જસપ્રિત બુમરાહ અને ઋષભ પંતની ફિટનેસ અંગે સત્તાવાર અપડેટ આપી હતી. રાહુલ અને અય્યર માટે, એવું કહેવામાં આવ્યું હતું કે, ‘બંનેએ નેટમાં બેટિંગ શરૂ કરી છે, અને સ્ટ્રેન્થ અને ફિટનેસ ડ્રિલનો ભાગ બની રહ્યા છે. BCCIની મેડિકલ ટીમ બંનેની ફિટનેસ પ્રગતિથી સંતુષ્ટ છે, આગામી દિવસોમાં બંનેની ફિટનેસ કવાયત વધુ કડક કરવામાં આવશે. આ પછી, ટીમ મેનેજમેન્ટને લાગ્યું કે રાહુલ અને શ્રેયસનું બેકઅપ તૈયાર રાખવું ખૂબ જ મહત્વપૂર્ણ છે અને આ માટે વેસ્ટ ઈન્ડિઝ સામે ચાલી રહેલી વનડે શ્રેણીથી સારી કોઈ તક હોઈ શકે નહીં.
તેથી જ પ્રથમ મેચથી જ બેટિંગ ઓર્ડર અને બેટ્સમેનોને લઈને પ્રયોગો શરૂ થઈ ગયા હતા. ક્રિકબઝના મતે કેએલ રાહુલ અને શ્રેયસ અય્યર માટે એશિયા કપમાં રમવું ઘણું મુશ્કેલ છે અને આવી સ્થિતિમાં ટીમ ઈન્ડિયાને આ બંનેના બેકઅપની જરૂર પડશે. જો બંને એશિયા કપ સુધી ફિટ ન હોય, તો બંનેને 2023 વર્લ્ડ કપ પહેલા ઓસ્ટ્રેલિયા સામે માત્ર ત્રણ મેચની ODI સિરીઝ રમીને પોતાની મેચ ફિટનેસ સાબિત કરવાની તક મળશે. ભારતે વર્લ્ડ કપ પહેલા 22 થી 27 સપ્ટેમ્બર દરમિયાન ઓસ્ટ્રેલિયા સામે ત્રણ મેચની વનડે શ્રેણી રમવાની છે. આવી સ્થિતિમાં ટીમ મેનેજમેન્ટ ઈચ્છે છે કે ટીમ ઈન્ડિયા પાસે હંમેશા બેકઅપ વિકલ્પ તૈયાર હોવો જોઈએ. સૂર્યકુમાર યાદવ અને સંજુ સેમસન આ બેના બેકઅપ તરીકે ગણી શકાય.
