બુધવારે કેન્દ્રીય કેબિનેટની બેઠકમાં 19,744 કરોડ રૂપિયાના ખર્ચના ‘નેશનલ ગ્રીન હાઇડ્રોજન મિશન’ને મંજૂરી આપવામાં આવી હતી. 15 ઓગસ્ટ 2021ના રોજ સ્વતંત્રતા દિવસ પર પીએમ મોદીએ તેમના ભાષણમાં નેશનલ ગ્રીન હાઇડ્રોજન મિશનની જાહેરાત કરી હતી.
કેન્દ્રીય મંત્રી અનુરાગ ઠાકુરે કેબિનેટની બેઠકમાં લેવાયેલા નિર્ણયો વિશે માહિતી આપતા કહ્યું કે, “PM મોદીના નેતૃત્વમાં કેબિનેટની બેઠકમાં મહત્વપૂર્ણ નિર્ણયો લેવામાં આવ્યા છે. આજે કેન્દ્રીય કેબિનેટે નેશનલ ગ્રીન હાઇડ્રોજન મિશનને મંજૂરી આપી છે. ભારત ગ્રીન હાઇડ્રોજનનું વૈશ્વિક હબ બનશે. વાર્ષિક 5 મિલિયન ટન ગ્રીન હાઇડ્રોજનનું ઉત્પાદન થશે.
તેનાથી 6 લાખ નોકરીઓ મળશે
કેન્દ્રીય મંત્રીએ કહ્યું, “રાષ્ટ્રીય ગ્રીન હાઇડ્રોજન મિશન માટે આજે 19,744 કરોડ રૂપિયા મંજૂર કરવામાં આવ્યા છે. આ મિશનથી 8 લાખ કરોડ રૂપિયાનું સીધું રોકાણ થશે. આનાથી 6 લાખ નોકરીઓ ઉપલબ્ધ થશે. ગ્રીન હાઉસ ઉત્સર્જનમાં 50 મિલિયન ટનનો ઘટાડો થશે.” તેમણે કહ્યું, “હિમાચલ પ્રદેશ માટે 382 મેગાવોટ સુન્ની ડેમ હાઇડ્રોઇલેક્ટ્રિક પાવર પ્રોજેક્ટને મંજૂરી આપવામાં આવી છે. 2,614 કરોડનો ખર્ચ થશે. તે સતલજ નદી પર બનાવવામાં આવશે.
17,490 કરોડની પ્રોત્સાહક રકમ આપવામાં આવશે
કેન્દ્રીય મંત્રી અનુરાગ ઠાકુરે કહ્યું, “60-100 ગીગાવોટની ક્ષમતાના ઈલેક્ટ્રોલાઈઝર તૈયાર કરવામાં આવશે. ઈલેક્ટ્રોલાઈઝરના ઉત્પાદન અને ગ્રીન હાઈડ્રોજનના ઉત્પાદન પર 17,490 કરોડની પ્રોત્સાહક રકમ આપવામાં આવશે. ગ્રીન હાઈડ્રોજનનું હબ વિકસાવવા માટે 400 કરોડની જોગવાઈ કરવામાં આવી છે.
