દેશભરમાં કોરોનાનો કહેર હાલ યથાવત છે. તો કોરાના વાયરસ સામે વેક્સીન બનાવવાની કામગીરી પણ ઝડપથી ચાલી રહી છે. તેવામાં પ્રધાનમંત્રી નરેન્દ્ર મોદીએ લક્ઝમબર્ગના પોતાના સમકક્ષ ઝેવિયર બેટલના વેક્સીન લઇ જવા માટે સ્પેશ્યલ રેફ્રિજિરેટેડ ટ્રાન્સપોટેશન પ્લાન્ટ લગાવવાના પ્રસ્તાવને સ્વીકાર કરી લીધો છે. એક અગ્રણી સમાચાર પત્રના રિપોર્ટ પ્રમાણે આ ટ્રાન્સપોર્ટેશન પ્લાન્ટ ગુજરાતમાં સ્થાપિત કરવાની યોજના છે.

દિલ્હી અને અમદાવાદ સ્થિત આધિકારિક સૂત્રોના મતે લક્ઝમબર્ગ ફર્મ બી મેડિકલ સિસ્ટમ્સ સોલર વેક્સીન રેફ્રિજરેટર, ફ્રીઝર અને ટ્રાન્સપોર્ટ બોક્સ સહિત એક વેક્સીન કોલ્ડ ચેઈન સ્થાપિત કરવા માટે આગામી સપ્તાહે એક ઉચ્ચ સ્તરીય ટીમ ગુજરાત મોકલી રહી છે. એક પૂર્ણ પ્લાન્ટની સ્થાપના માટે લગભગ બે વર્ષની આવશ્યકતા હશે.

કંપનીએ લક્ઝમબર્ગથી બોક્સ અને સ્ત્રોત ઘરેલું બજારથી સર્વશ્રેષ્ઠ સામગ્રી પ્રાપ્ત કરીને આત્મનિર્ભર ભારત કાર્યક્રમ અંતર્ગત શરૂઆત કરવાનો નિર્ણય કર્યો છે. મહત્વનું છે કે, પરિવહન બોક્સ શૂન્યથી નીચે ચાર ડિગ્રી સેલ્સિયસથી 20 ડિગ્રી વચ્ચે વેક્સીન ડિલિવરી કરવામાં સક્ષમ હશે. જ્યારે લક્ઝમબર્ગ સ્થિત કંપની પાસે શૂન્યથી 80 ડિગ્રી નીચે વેક્સીન પરિવહન કરવાની પણ ટેકનિક છે.

દુનિયાભરમાં કોરોના વાયરસ ઝડપથી ફેલાઈ રહ્યો છે ત્યારે વૈજ્ઞાનિકો તેની સંપૂર્ણ રીતે શોધ કરી શક્યા નથી. સતત અનેક પ્રકારના રિસર્ચ કોરોના વાયરસના સંક્રમણ પર થઈ રહ્યા છે. ત્યારે હાલમાં એક સંશોધનમાં જાણવા મળ્યું છે કે સુપર સ્પ્રેડરની મદદથી ઝડપથી કોરોના ફેલાઈ રહ્યો છે.

આ લોકો પોતાના ડ્રોપ્લેટ્સની મદદથી અનેક લોકોને સંક્રમિત કરે છે. શોધના આધારે જાણવા મળ્યું છે કે સંક્રમિત લોકોની દાંતની સંખ્યા, મોઢામાં લાળનું પ્રમાણ અને અલગ અલગ રીતે છીંક ખાવાની રીત જણાવે છે કે તેમના ડ્રોપ્લેટ્સ હવામાં કેટલા દૂર સુધી જશે અને અન્ય લોકોને સંક્રમણનો ખતરો કેટલો રહેશે.

તેમનું કહેવું છે કે જેમનું નાક સાફ નથી અને જેમના દાંત પૂરા હોય છે તેમના મોઢામાંથી ડ્રોપ્લેટ્સ નીકળે છે જેનાથી સંક્રમણનો ખતરો વધારે રહે છે. તેમનું કહેવું છે કે દાંત છીંકને વધારે છે. એવામાં તેમનામાંથી નીકળતા ડ્રોપ્લેટ્સ પણ વધારે દૂર સુધી જાય છે. સંશોધનકર્તાઓએ એ પણ જણાવ્યું કે, આવા 60 ટકા લોકો સુધી વધારે ખતરનાક ડ્રોપ્લેટ્સ ઉત્પન્ન થતા હોવાનું જાણવા મળ્યું છે.

કોરોના મહામારીથી પ્રભાવિત દુનિયાભરના દેશો કોવેક્સીનની રાહ જોઇ રહ્યા છે, એવામાં રશિયાએ દાવો કર્યો હતો કે, તેની કોવેક્સીન Sputnik V બીજા પરીક્ષણ મુજબ 95 ટકા કારગર સાબિત થઇ રહી છે. રશિયન કોવેક્સીન ડેવલેપર્સે આ અંગેની માહિતી આપી હતી. રશિયાના સ્વાસ્થ મંત્રાલય દ્વારા અપાયેલા નિવેદન મુજબ કોવેક્સીનનું અસરકારક પ્રમાણ 42 દિવસના અભ્યાસ બાદ મળેલા પરિણામોને આધારિત હતું.

રશિયાએ તેની કોવેક્સીનની કિંમતને લઇને પણ મહત્વના ખુલાસા કર્યા હતા. તેની જાહેરાતમાં કહેવામાં આવ્યું હતું કે અન્ય કોવેક્સીનની સરખામણીએ Sputnik Vની કિંમત ઓછી રહેશે. રશિયન કોવેક્સીનના બે શોટની કિંમત આંતરરાષ્ટ્રીય બજારોમાં પ્રતિ વ્યક્તિ 20 ડોલરથી ઓછી રહેશે. તેના એક શોટની કિંમત 10 ડોલરથી ઓછી રહેશે.

આ પહેલા અમેરિકન ફાર્મા કંપની ફાઇઝર અને મોર્ડનાએ તેમની કોવેક્સીનને 90 ટકાથી વધુ પ્રભાવિત જાહેર કરી ચૂક્યા છે. મહત્વનું છે કે, રશિયાએ ઓગસ્ટમાં Sputnik Vની નોંધણી કરાવી હતી. આ કોવેક્સીનનો ડોઝ રશિયન રાષ્ટ્રપતિ વ્લાદિમિર પુતિનની પુત્રીને પણ આપવામાં આવ્યો હતો. રશિયાની સરકારના સત્તાવાર નિવેદન મુજબ રશિયાના નાગરિકો માટે વેક્સીનેશન ફ્રી રહેશે જ્યારે દુનિયામાં અન્ય ગ્રાહકોને રશિયન કોવેક્સીનનો પહેલો જથ્થો માર્ચ 2021 સુધી પહોંચી જશે.