કર્ણાટકની રાજધાની બેંગલુરુમાં એક દર્દનાક અકસ્માત થયો છે. અહીં, આઉટર રિંગ રોડ પર નાગવાડા પાસે નિર્માણાધીન મેટ્રોનો થાંભલો પડી જવાને કારણે બે લોકોના મોત થયા છે. બેંગ્લોર ઈસ્ટના ડીસીપી ડો. ભીમાશંકર એસ ગુલેડે જણાવ્યું કે મૃત્યુ પામેલા બંને લોકો એક જ પરિવારના છે. અહેવાલો અનુસાર, અકસ્માતમાં મૃત્યુ પામેલાઓમાં એક મહિલા અને તેના અઢી વર્ષના બાળકનો સમાવેશ થાય છે. અકસ્માત સ્થળે રાહત અને બચાવ કાર્ય ચાલી રહ્યું છે.
કહેવામાં આવી રહ્યું છે કે આ દર્દનાક ઘટનામાં મૃતક મહિલાનો પતિ ઘાયલ થયો છે. જે સમયે થાંભલો પડ્યો તે સમયે તમામ લોકો બાઇક પર મુસાફરી કરી રહ્યા હતા. તેને તાત્કાલિક હોસ્પિટલ લઈ જવામાં આવ્યો. હોસ્પિટલમાં સારવાર દરમિયાન મહિલા અને તેના બાળકનું મોત નીપજ્યું હતું. આ અકસ્માતમાં અન્ય કેટલાક લોકોને પણ ઈજાઓ પહોંચી છે. મૃતકોની ઓળખ 25 વર્ષની તેજસ્વી અને તેના અઢી વર્ષના પુત્ર વિહાન તરીકે થઈ છે.
કોંગ્રેસ શાસક ભાજપ પર પ્રહાર
આ ઘટના બાદ કોંગ્રેસ સત્તાધારી ભાજપ પર આક્રમક બની છે. કર્ણાટક કોંગ્રેસના અધ્યક્ષ ડીકે શિવકુમારે કહ્યું છે કે આ ‘40% કમિશન’ સરકારનું પરિણામ છે. રાજ્યના વિકાસના કામોમાં ગુણવત્તા નથી. આ અકસ્માત માટે ભાજપ સરકાર જવાબદાર છે.
ઓવરલોડ થઈ જતાં થાંભલો બાઇક પર પડ્યો હતો
ડીસીપી ઈસ્ટ ભીમાશંકર એસ ગુલેડે જણાવ્યું કે, દંપતી તેમના પુત્ર સાથે હેબ્બલ જઈ રહ્યા હતા. મેટ્રોનો થાંભલો ઓવરલોડ થઈને બાઇક પર પડ્યો હતો. માતા અને પુત્ર પાછળની સીટ પર બેઠા હતા.”
