મહિલાઓ સામે ઘરેલું હિંસાની ઘટનાઓને લઈને સુપ્રીમ કોર્ટ કડક બની છે. જણાવી દઈએ કે, સુપ્રીમ કોર્ટે કેન્દ્ર સરકારને ઘરેલુ હિંસા મુદ્દે તમામ રાજ્યોના મુખ્ય સચિવોની બેઠક બોલાવવાનો નિર્દેશ આપ્યો છે. બેઠકમાં મહિલાઓને ઘરેલુ હિંસાથી બચાવવા માટે ઘરેલુ હિંસા કાયદાના અમલીકરણ અંગે ચર્ચા કરવા સૂચના આપવામાં આવી છે. જણાવી દઈએ કે જુલાઈ 2022 સુધી દેશની અદાલતોમાં ઘરેલુ હિંસાના લગભગ 4.71 લાખ કેસ પેન્ડિંગ છે.
તમને જણાવી દઈએ કે સુપ્રીમ કોર્ટમાં એક અરજી દાખલ કરવામાં આવી છે, જેમાં ઘરેલુ હિંસાનો ભોગ બનેલી મહિલાઓને યોગ્ય કાયદાકીય મદદ મળે અને ઘરેલું હિંસાનો ભોગ બનેલી મહિલાઓ માટે શેલ્ટર હોમ બનાવવાની માંગ કરવામાં આવી છે. આ અરજી પર સુનાવણી કરતા જસ્ટિસ એસઆર શાહ અને જસ્ટિસ દીપાંકર દત્તાની બેન્ચે કહ્યું કે પ્રોટેક્શન ઓફિસરને ડોમેસ્ટિક વાયોલન્સ એક્ટ હેઠળ તૈનાત કરવામાં આવે. કોર્ટે ટિપ્પણી કરી હતી કે આ કેસમાં અત્યાર સુધી જે ચિત્ર જોવા મળ્યું છે તે એકદમ ધુંધળું છે.
બેન્ચે કહ્યું કે દેશમાં પેન્ડિંગ કેસની સંખ્યામાં 500-600 કેસની સુનાવણી પ્રોટેક્શન ઓફિસરના હિસ્સામાં આવે છે. આવી સ્થિતિમાં વધુ સંખ્યામાં અધિકારીઓ તૈનાત કરવા જોઈએ. કોર્ટે કહ્યું કે કેન્દ્ર સરકારે આ મામલે ગંભીરતાથી વિચાર કરવાની જરૂર છે.
કોર્ટે નિર્દેશ આપ્યો છે કે મહિલા અને બાળ વિકાસ મંત્રાલયના સચિવ ઘરેલુ હિંસાના મુદ્દા પર ચર્ચા કરવા માટે તમામ રાજ્યો અને કેન્દ્રશાસિત પ્રદેશોના સચિવોની બેઠક બોલાવે. કોર્ટે કહ્યું કે મુખ્ય સચિવોની બેઠકમાં નાણા, ગૃહ અને સામાજિક ન્યાય મંત્રાલયના સચિવો અને રાષ્ટ્રીય મહિલા આયોગ અને રાષ્ટ્રીય ન્યાયિક સેવા પ્રાધિકરણના નામાંકિત અધ્યક્ષોએ પણ હાજરી આપવી જોઈએ. હવે સુપ્રીમ કોર્ટ આ મામલે આઠ સપ્તાહ બાદ સુનાવણી કરશે.
