INDvsAUS: વિરાટ કોહલીની (54) અડધી સદી નિરર્થક ગઈ કારણ કે ઓસ્ટ્રેલિયાએ શ્રેણીની ત્રીજી અને અંતિમ વનડેમાં ભારતને 21 રને હરાવી શ્રેણી 2-1થી જીતી લીધી. ઓસ્ટ્રેલિયાએ ચેન્નાઈમાં રમાયેલી ત્રીજી અને અંતિમ વનડેમાં ટીમ ઈન્ડિયાને 21 રને હરાવીને ત્રણ મેચની શ્રેણી 2-1થી જીતી લીધી છે. ઓસ્ટ્રેલિયાએ નીચલા ક્રમના બેટ્સમેનોની ઉપયોગી ઇનિંગ્સની મદદથી પ્રથમ બેટિંગ કરતા 269 રન બનાવ્યા હતા.તે પછી એડમ ઝમ્પાની આગેવાનીમાં બોલરોએ શાનદાર બોલિંગ કરીને ભારતીય દાવને 49.1 ઓવરમાં 248 રનમાં સમેટી લીધો હતો. હાર્દિક પંડ્યા અને કુલદીપ યાદવે બોલિંગ વડે ઓસ્ટ્રેલિયાને મોટો સ્કોર કરતા અટકાવ્યો હતો. પ્રથમ પાવરપ્લેમાં મિચેલ માર્શ અને ટ્રેવિસ હેડે ભારતીય બોલરોની સામે રન ઉમેર્યા હતા.
પરંતુ ભારતીય બોલરોએ મધ્ય ઓવરોમાં ઓસ્ટ્રેલિયાના બેટ્સમેનોને હાવી થવા દીધા ન હતા. ઓસ્ટ્રેલિયાના સાત બેટ્સમેન 40 ઓવર સુધીમાં પેવેલિયન પરત ફર્યા હતા. પરંતુ એશ્ટન અગર, સીન એબોટ, મિશેલ સ્ટાર્ક અને એડમ ઝમ્પાએ ટીમને 49 ઓવરમાં 269 સુધી પહોંચાડી દીધી હતી.
