પાકિસ્તાનના બલૂચિસ્તાનમાં બોમ્બ બ્લાસ્ટ બાદ હવે ખૈબર પખ્તુનખ્વાની એક મસ્જિદમાં આતંકી હુમલો થયો છે. આ બોમ્બ બ્લાસ્ટ એટલો જોરદાર હતો કે મસ્જિદનો મોટો ભાગ ધરાશાયી થઈ ગયો. આ બંને બ્લાસ્ટ એક જ દિવસે થયા હતા. બલૂચિસ્તાનના મસ્તુંગમાં 52 લોકોના મોત થયા છે. આ સિવાય 100થી વધુ લોકો ઘાયલ થયા છે. હવે ખૈબર પખ્તુનખ્વામાં બ્લાસ્ટથી પાકિસ્તાનની સુરક્ષા વ્યવસ્થા પર સવાલો ઉભા થયા છે. બીજો બોમ્બ બ્લાસ્ટ ખૈબરના હંગુમાં થયો હતો. પ્રારંભિક અહેવાલો અનુસાર, વિસ્ફોટ બાદ મસ્જિદનો મોટો ભાગ ધરાશાયી થઈ ગયો હતો અને મોટી સંખ્યામાં લોકો કાટમાળ નીચે દટાઈ ગયા હતા.
આ હુમલામાં બે લોકોના મોત થયા છે, જ્યારે 5 લોકો ઘાયલ થયા છે. કેટલાક મૃતદેહો મસ્જિદના કાટમાળ નીચે દટાયેલા છે, તેથી મૃત્યુઆંક વધી શકે છે. હંગુ જિલ્લા પોલીસ અધિકારી નિસાર અહેમદે પણ મૃત્યુની પુષ્ટિ કરી છે. તેમણે કહ્યું કે શુક્રવારે બપોરે નમાજ દરમિયાન બ્લાસ્ટ થયો હતો. બોમ્બ બ્લાસ્ટને કારણે મસ્જિદની છત પડી ગઈ હતી. જેના કારણે લગભગ 40 લોકો કાટમાળમાં ફસાયા હતા. બલુટિસ્તાનના મસ્તુંગમાં વહેલી સવારે આત્મઘાતી હુમલો થયો હતો. અત્યાર સુધીમાં 52 લોકોના મોત થયા છે, જ્યારે 100થી વધુ લોકો ઘાયલ થયા છે.
મસ્તુંગમાં પણ બ્લાસ્ટ મસ્જિદ પાસે થયો હતો. આ ઘટના એવા સમયે બની જ્યારે મોટી સંખ્યામાં લોકો પયગંબર મોહમ્મદના જન્મદિવસની ઉજવણી કરવા માટે એકત્ર થઈ રહ્યા હતા. આતંકવાદી હુમલો એટલો ભયાનક હતો કે દરેક જગ્યાએ મૃતદેહો અને લોહી વિખરાયેલા હતા. બલૂચિસ્તાનનો મસ્તુંગ જિલ્લો આતંકવાદની દૃષ્ટિએ સંવેદનશીલ છે. આ મહિનાની શરૂઆતમાં પણ અહીં આતંકી હુમલો થયો હતો, જેમાં 11 લોકો ઘાયલ થયા હતા. આજના હુમલામાં સ્થળ પર સુરક્ષા માટે તૈનાત એક પોલીસકર્મીનું પણ મોત થયું છે.
