ઈન્ટરનેશનલ ક્રિકેટ કાઉન્સિલ (ICC) દ્વારા જાહેર કરવામાં આવેલી T20 ખેલાડીઓની તાજેતરની રેન્કિંગમાં ભારતનો ઓપનિંગ બેટ્સમેન યશસ્વી જયસ્વાલ ઉભરી આવ્યો છે. તેણે સાત સ્થાનની છલાંગ લગાવીને ટોપ-10માં પ્રવેશ કર્યો છે. યશસ્વી છઠ્ઠા સ્થાને પહોંચી ગયો છે, જે તેની T20 કારકિર્દીની સર્વશ્રેષ્ઠ રેન્કિંગ છે. હાલમાં તેના 739 રેટિંગ પોઈન્ટ છે. યશસ્વીએ તાજેતરમાં અફઘાનિસ્તાન સામેની બીજી T20માં તોફાની અડધી સદી ફટકારી હતી. તેણે 34 બોલમાં 5 ચોગ્ગા અને 6 છગ્ગાની મદદથી 68 રન બનાવ્યા હતા. તે ત્રણ મેચની શ્રેણીની પ્રથમ મેચમાં રમ્યો ન હતો. ભારતે 2-0ની લીડ જાળવી રાખી છે.
પાકિસ્તાનના બેટ્સમેન બાબર આઝમને એક સ્થાનનો ફાયદો થયો છે. તે હવે ચોથા નંબર પર આવી ગયો છે. તેને 763 માર્કસ છે. ન્યુઝીલેન્ડ સામેની ટી20 સીરીઝમાં બાબરનું બેટ જોરદાર બોલે છે. તેણે પ્રથમ ત્રણ મેચમાં ફિફ્ટી ફટકારી હતી. જોકે, પાકિસ્તાન પાંચ મેચોની શ્રેણીમાં 0-3થી પાછળ છે. ભારતના દિગ્ગજ બેટ્સમેન સૂર્યકુમાર યાદવ (869) ટોપ પર યથાવત છે. ઈજાના કારણે તે અફઘાનિસ્તાન શ્રેણીનો ભાગ નથી. ઈંગ્લેન્ડનો ફિલ સોલ્ટ (802) બીજા સ્થાને અને પાકિસ્તાનનો મોહમ્મદ રિઝવાન (763) ત્રીજા સ્થાને છે. ભારતના ઋતુરાજ ગાયકવાડ (661) નવમા સ્થાને છે.
જ્યારે ટી20 બોલરોની રેન્કિંગની વાત કરીએ તો ભારતના સ્પિન ઓલરાઉન્ડર અક્ષર પટેલ ટોપ-5માં પ્રવેશી ગયો છે. તે 667 પોઈન્ટ સાથે પાંચમા સ્થાને છે. આ તેની ટી20 કારકિર્દીની સર્વશ્રેષ્ઠ રેન્કિંગ છે. અક્ષરે અફઘાનિસ્તાન સામેની બે મેચમાં ચાર વિકેટ લીધી હતી. ઈંગ્લેન્ડનો આદિલ રાશિદ (726) નંબર વન બોલર છે. વેસ્ટ ઈન્ડિઝના અકીલ હુસૈન (683) બીજા સ્થાને છે. ભારતનો લેગ સ્પિનર રવિ બિશ્નોઈ (666) છઠ્ઠા સ્થાને સરકી ગયો છે. બિશ્નોઈને પ્રથમ ટી20માં કોઈ વિકેટ મળી ન હતી, જ્યારે બીજી મેચમાં તેણે બે ખેલાડીઓને પેવેલિયનનો રસ્તો બતાવ્યો હતો.
