હિંમતનગર માર્કેટ યાર્ડમાં ઉચ્ચત્તમ વેચાણ ભાવ મળી રહ્યા હોવાથી મગફળીની ધિંગી ખરીદી થઇ રહી છે. ગઈકાલે રૂ. 150 જેટલો ભાવ તૂટવા છતાં ટેકાના ભાવ કરતા વધારે મળતો હોવાથી ખેડૂતોના મગફળી વેચવા માટે ધસારો રહ્યો છે. સોમવારે 26390 બોરીની આવક થઇ હતી અને 120 ખેડૂતોની ખરીદી બાકી રહેતા મંગળવાર માટે ટોકન અપાયા હતા. મગફળીની આવકમાં વધારો થતાં ભાવમાં રૂ.150 નો કડાકો બોલી ગયો હતો. શનિવારે મહત્તમ રૂ.1470 ભાવ બોલાયા બાદ સોમવાર મહત્તમ રૂ. 1323 નો ભાવ પડ્યો હતો. મગફળીના ઊંચા ભાવને કારણે હિંમતનગર માર્કેટયાર્ડમાં ધસારો થઇ રહ્યો છે. શનિવાર, રવિવાર અને સોમવાર એમ સતત 3 દિવસથી ખેડૂતો માર્કેટ યાર્ડ પર લાઇનો લગાવી રહ્યા છે. ઊંચા ભાવે સૌરાષ્ટ્ર ના હળવદ, મહેસાણાના વિજાપુર, ગાંધીનગર જિલ્લાના માણસા અને અરવલ્લી જિલ્લાના ખેડૂતોના વાહનોને પણ હિંમતનગર માર્કેટ યાર્ડ તરફ વાળી દીધા છે. સોમવારે મગફળી વેચવા માટે ખેડૂતો વાહનો લઈને હિંમતનગર માર્કેટ યાર્ડ રવિવારથી લાઈનો લગાવી દીધી હતી. સોમવારે ધિંગી આવક ને પગલે ભાવ નીચા આવ્યા હતા. સોમવારે 26390 બોરી મગફળીની રૂ.900 થી 1323ના ભાવે ખરીદી કરાઇ હતી.ખેડૂતોના ધસારાને પગલે બપોરે અઢી વાગ્યાના બદલે સાંજે સાડા ચાર વાગ્યા સુધી હરાજી ચાલુ રખાઇ હતી.
