વિજાપુર સ્વચ્છ સર્વેક્ષણ 2022 હેઠળ ચોમાસાની ઋતુને ધ્યાને રાખી નગરપાલિકાના આરોગ્ય સ્ટાફ દ્વારા ખત્રી કુવાના ચક્કર સ્ટેશન રોડ સહિત વિવિધ વિસ્તારમાં ખાણીપીણીની લારીઓ તેમજ દુકાનો પર ચેકિંગ હાથ ધરી કાર્યવાહી કરી હતી. આ કાર્યવાહી હેઠળ વાસી ખોરાકનો નાશ કરાયો હતો. તેમજ વેપાર કરતા લોકો સેફ્ટી હાથ મોજા, સેફટી ટોપી પહેરે છે કે નહીં તેની પણ તપાસ કરાઇ હતી.આ ચેકિંગમાં પાંચ જેટલા લારી ધારકોને નિયમોનું પાલન ન કરવા બદલ રૂપિયા 500નો દંડ ફટકારી કાર્યવાહી કરાઈ હતી.

જ્યારે વિજાપુર ઓફિસર જયેશ પટેલના જણાવ્યા અનુસાર તમામ વેપારીઓ પોતાના વેપાર-ધંધા પર સ્વચ્છતા રાખવી, ધંધાની આજુબાજુની જગ્યા ચોખ્ખી રાખી, સ્વચ્છતા જાળવી નિયમોનું પાલન કરે નહીં તો હજુ પણ પાલિકા દ્વારા કડક દંડનીય કાર્યવાહી કરવામાં આવશે.બીજી બાજુ ખાણી-પીણીના વેપારીઓને પુછતા તેઓએ જણાવ્યું કે, વિજાપુરમાં કોઈપણ દુકાનમાં સેફ્ટી કેપ, હાથના મોજા મળતા નથી તેથી અમે આ નિયમ પાળી શકતા નથી.

મહેસાણા પાલિકાએ કરોડો રૂપિયા ખર્ચ કરી બિલાડી બાગ સામે અટલ સ્પોર્ટ્સ સેન્ટરનો વહીવટ ખુબજ નોર્મલ ચાર્જમાં ખાનગી એજન્સીને સોંપવામાં આવ્યા બાદ એજન્સીએ સ્વિમિંગ માટે આવતા સભ્ય પાસે ફી અને અન્ય સર્વિસ ચાર્જન ગેરકાયદે ઉઘરાણા કરતા વિપક્ષ નેતા કમલેશ સુતરિયાએ પ્રાદેશિક કમિશ્નરને ફરિયાદ કરી હતી. જેના પગલે પ્રાદેશિક કમિશ્નર દ્વારા ચીફ ઓફિસરને તપાસના આદેશ કર્યા છે.

પ્રાદેશિક કમિશ્નર કચેરીના અધિક કલેક્ટર એમ.એસ. ગઢવીએ ચીફ ઓફિસરને પાઠવેલ પત્રમાં જણાવ્યું છે કે, ગત 17 મેંના રોજ કમલેશ સુતરિયાએ અટલ સપોર્ટ સેન્ટરમાં સ્વિમિંગ ફીમાં થતા સર્વિસ ચાર્જન નામે એજન્સી દ્વારા ગેરકાયદેસર ફી ઉઘરાવતા હોવાથી ફરિયાદ કરી હતી. જેની યોગ્ય તપાસ કરી અરજદારને જવાબ આપવા તાકીદ કરી છે.

મહેસાણા એસ.ટી ડિવિઝન સંચાલિત ઊંઝા એસટી ડેપોની લાપરવાહી સામે આવી છે. જેમા ઊંઝા એસ.ટી ડેપોની એક બસનું ચાલુ બસે ટાયર નીકળી જતા બસમાં બેસેલા મુસાફરોના જીવ અધ્ધર થઇ ગયા હતા. જોકે, સદનસીબે દુર્ઘટનામાં કોઇ જાનહાની નથી થઇ.ઊંઝા ડેપો સંચાલિત ઊંઝા-જૂનાગઢ એસ.ટી બસ રાત્રે 7. 30 કલાકે ઉપડી હતી.

જ્યારે સોમવારે સવારે 5:00 વીરપુર નજીક પહોંચતા જ એકાએક ચાલુ બસનું પાછળનું ટાયર નીકળી ગયું હતું. જોકે, ડ્રાઈવર દ્વારા બસને કંટ્રોલ કરી દેવાતા મોટી દુર્ઘટના ટળી હતી અને મુસાફરોનો આબાદ બચાવ થયો હતો. ચાલુ બસે પાછળનું ટાયર નીકળી જવા મામલે મુસફરો પણ રોષે ભરાય હતા.